មន្ត្រីពីការិយាល័យប្រធានាធិបតី នៅថ្ងៃព្រហស្បតិ៍ (ទី៣០ ខែមករា) នេះ បានប្រាប់ឲ្យដឹងថា រដ្ឋមន្ត្រីការបរទេសបារាំង លោក Jean-Noël Barrot បានទៅដល់រដ្ឋធានី Kinshasa របស់ប្រទេសកុងហ្គោហើយ ខណៈដែលក្រុមឧទ្ទាមគាំទ្រដោយប្រទេសរ្វ៉ាន់ដា បានពង្រឹងការគ្រប់គ្រងរបស់ពួកគេយ៉ាងរឹងមាំលើទីក្រុង Goma នៅភាគខាងកើតរបស់ប្រទេសអាហ្វ្រិកមួយនេះ។

អ្នកនាំពាក្យរងរបស់ប្រធានាធិបតីលោក Felix Tshisekedi គឺលោក Giscard Kusema បាននិយាយថា៖ «រដ្ឋមន្ត្រីក្រសួងការបរទេសបារាំង នឹងត្រូវបានទទួលស្វាគមន៍នៅប៉ុន្មាននាទីខាងមុខដោយលោកប្រធានាធិបតី»។

អ្នកការទូតបារាំងម្នាក់ បានបញ្ជាក់ថា យន្តហោះដឹកលោក Barrot បានចុះចតនៅទីក្រុង Kinshasa ហើយ ពោលគឺប៉ុន្មានថ្ងៃបន្ទាប់ពីក្រុមឧទ្ទាម M23 ដែលមានការគាំទ្រពីកងទ័ពរ្វ៉ាន់ដា បានចូលទៅដល់ទីក្រុង Goma និងកំពុងបន្តការវាយលុកឆ្ពោះទៅភាគខាងត្បូង ជាការកើនឡើងនូវតានតឹងដ៏ខ្លាំងក្លាបំផុត ចាប់តាំងពីឆ្នាំ២០១២ សម្រាប់ជម្លោះដែលមានអាយុកាលរាប់ទសវត្សរ៍មកហើយនោះ។

ក្រសួងការបរទេសបារាំង បានបដិសេធមិនធ្វើអត្ថាធិប្បាយអ្វីឡើយ ពាក់ព័ន្ធនឹងការធ្វើដំណើរនេះ៕