គណបក្សរិះគន់អឺរ៉ុប គឺ Centre Party (SP) របស់ប្រទេសន័រវ៉ែស នឹងចាកចេញពីរដ្ឋាភិបាល នៅថ្ងៃព្រហស្បតិ៍ (ទី៣០ ខែមករា) នេះ ដោយសារតែមានការខ្វែងគំនិតជាមួយដៃគូចម្រុះ គឺគណបក្ស Labour ជុំវិញការអនុម័តគោលនយោបាយថាមពលរបស់សហភាពអឺរ៉ុប (EU)។ នេះបើតាមទូរទស្សន៍សាធារណៈ NRK និងសារព័ត៌មាន VG ដែលបានរាយការណ៍ដោយដកស្រង់ប្រភពអនាមិក។

គណបក្ស Centre Party ដែលមានវត្តមាននៅក្នុងរដ្ឋាភិបាល ចាប់តាំងពីឆ្នាំ២០២១ មកនោះ គ្រងអាសនៈចំនួន៨ នៅក្នុងគណៈរដ្ឋមន្ត្រីចំនួន ២០នាក់របស់ប្រទេសន័រវ៉ែស ក្នុងនោះរួមទាំងកៅអីរដ្ឋមន្ត្រីហិរញ្ញវត្ថុ រដ្ឋមន្ត្រីការពារជាតិ និងរដ្ឋមន្ត្រីក្រសួងយុត្តិធម៌ និងសន្តិសុខសាធារណៈ ខណៈដែលគណបក្ស Centre Party កាន់តួនាទីចំនួន ១២ ដែលនៅសល់។

ប្រសិនបើការចាកចេញរបស់គណបក្ស Centre Party ត្រូវបានបញ្ជាក់ជាផ្លូវការនោះ គណបក្ស Labour ឥឡូវនេះ អាចដឹកនាំតែម្នាក់ឯង នៅក្នុងរដ្ឋាភិបាលសំឡេងភាគតិច រហូតដល់មានការបោះឆ្នោត ក្នុងខែកញ្ញា។ គណបក្ស Labour បាននិយាយថា ប្រទេសន័រវ៉ែស ត្រូវតែរក្សាទំនាក់ទំនងល្អជាមួយ EU ដោយសារការគំរាមកំហែងនៃការមានសង្គ្រាមពាណិជ្ជកម្ម រវាងអឺរ៉ុប និងសហរដ្ឋអាមេរិក។

គណបក្ស Centre Party មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ រដ្ឋមន្ត្រីក្រសួងហិរញ្ញវត្ថុ លោក Trygve Slagsvold Vedum ដែលដឹកនាំគណបក្សនេះ នៅតែស្ថិតក្នុងកិច្ចប្រជុំជាមួយនាយករដ្ឋមន្ត្រី លោក Jonas Gahr Steere នាព្រឹកថ្ងៃព្រហស្បតិ៍ តាមពេលវេលាម៉ោងក្នុងស្រុក៕