សហរដ្ឋអាមេរិកនៅតែតក់ស្លត់នៅឡើយពីហេតុការណ៍គ្រោះថ្នាក់ចរាចរណ៍លើអាកាសរវាងយន្តហោះដឹកអ្នកដំណើររបស់ក្រុមហ៊ុនអាកាសចរណ៍ American Airlines និងឧទ្ធម្ភាគចក្រ Black Hawk របស់កងទ័ពសហរដ្ឋអាមេរិកនៅក្នុងក្រុងវ៉ាស៊ីនតោនឌីស៊ី កាលពីយប់ថ្ងៃពុធសប្ដាហ៍នេះ ដែលបានសម្លាប់មនុស្សទាំងអស់ចំនួន ៦៧នាក់។

ស្របពេលក្រុមទីភ្នាក់ងារសហព័ន្ធបន្តការងារស្វែងរកនិងសង្រ្គោះនៅកន្លែងធ្លាក់យន្តហោះ ដើម្បីកំណត់ពីមូលហេតុនៃគ្រោះថ្នាក់ដ៏សាហាវនេះ ព័ត៌មានលម្អិតកំពុងចាប់ផ្តើមលេចចេញជាបណ្ដើរៗ។

យោងតាមសារព័ត៌មាន New York Times របាយការណ៍បឋមពីរដ្ឋបាលអាកាសចរណ៍សហព័ន្ធនិយាយថា បុគ្គលិកប្រចាំការនៅប៉មត្រួតពិនិត្យចរាចរណ៍ផ្លូវអាកាសរបស់អាកាសយានដ្ឋានជាតិ Reagan គឺមានសភាពខុសពីធម្មតា មុនពេលវេលាយន្តហោះធ្លាក់ និងធ្វើចរាចរណ៍ឲ្យយន្តហោះពីរក្នុងពេលតែមួយ មុនពេលយន្តហោះធ្លាក់។

ប្រភពពីសារព័ត៌មានខាងលើបានរាយការណ៍ថាអ្នកបញ្ជាចរាចរណ៍ម្នាក់ កំពុងកម្រង់ទិសចរាចរណ៍សម្រាប់ទាំងឧទ្ធម្ភាគចក្រទាំងយន្តហោះ ជាការងារដែលជាធម្មតាត្រូវបានបែងចែកក្នុងចំណោមមនុស្សច្រើនជាងម្នាក់។

លោក Jennifer Homendy ប្រធានក្រុមអ្នកស៊ើបអង្កេតជាមួយក្រុមប្រឹក្សាសុវត្ថិភាពដឹកជញ្ជូនជាតិ បាននិយាយក្នុងសន្និសីទសារព័ត៌មានកាលពីថ្ងៃព្រហស្បតិ៍សប្ដាហ៍នេះថាក្រុមនេះពុំទាន់បានទាញយកទិន្នន័យហោះហើរពីបំណែកយន្តហោះនៅក្នុងទន្លេ Potomac នៅឡើយទេ។ យើងមិនទាន់រកឃើញឧបករណ៍ថតទិន្នន័យជើងហោះហើរនៅឡើយដែរ។ យើងដឹងថាទាំងនោះស្ថិតនៅក្រោមទឹក៕