លោក ខណេល ណានហ្គា(Corneille Nangaa) មេដឹកនាំសម្ព័ន្ធក្រុមចម្រុះឧទ្ទាមកុងហ្គោ ដែលរួមមានចលនាក្រុម M23 បានប្តេជ្ញាកាលពីថ្ងៃព្រហស្បតិ៍ ទី៣០ ខែមករា ថា នឹងបន្តស្នាក់នៅក្នុងទីក្រុង Goma ហើយនឹងបន្តរុលចូលទៅកាន់ទីក្រុង Kinshasa ប៉ុន្មានថ្ងៃបន្ទាប់ពីការដណ្តើមបានទីក្រុងយុទ្ធសាស្ត្រនៅភាគខាងកើត។

និយាយនៅក្នុងសន្និសីទសារព័ត៌មានក្នុងទីក្រុង Goma លោក Nangaa បានអះអាងថា ក្រុមឧទ្ទាមកំពុងបង្កើតច្រករបៀងមនុស្សធម៌ដែលមានសុវត្ថិភាពសម្រាប់ជនភៀសខ្លួនដើម្បីវិលត្រឡប់ទៅលំនៅឋានវិញ។ លោក បានរិះគន់រដ្ឋាភិបាលរបស់ប្រធានាធិបតី លោក Felix Tshisekedi ដោយចោទប្រកាន់ថា បានបង្កើតកម្លាំងយោធាហួសពីតំបន់ និងបំពាក់អាវុធដល់ជនស៊ីវិលដែលពុំបានបណ្តុះបណ្តាល។

ទោះបីជាមានការធានាពី លោក Nangaa ក៏ដោយ ក៏ដងផ្លូវនានានៅទីក្រុង Goma នៅតែស្ងាត់ជ្រងំ ដោយមានកម្ទេចកម្ទី និងសម្លៀកបំពាក់យោធានៅរាយប៉ាយ។

អ្នកប្រយុទ្ធក្រុម M23 ប្រដាប់ដោយអាវុធធុនធ្ងន់ បានល្បាតក្នុងទីក្រុងដោយរថយន្តភីកអាប់ ដែលបង្ហាញពីស្ថានភាពតានតឹង។

ការរុលទៅមុខរបស់ក្រុមឧទ្ទាម បានបង្កឱ្យមានវិបត្តិមនុស្សធម៌ បង្ខំឱ្យមនុស្សរាប់ពាន់នាក់ភៀសខ្លួនទៅកាន់ប្រទេសរ៉្វាន់ដា ដែលនៅជិតខាង។ ខណៈក្រុម M23 រុលទៅភាគខាងត្បូងទីក្រុង Bukavu សម្ពាធអន្តរជាតិកំពុងកើនឡើងដាក់លើប្រទេសរ៉្វាន់ដា ជុំវិញការចោទប្រកាន់ថាបានគាំទ្រក្រុមឧទ្ទាម។