ប្រធានាធិបតី លោក Paul Kagame បាននិយាយថា ប្រទេសរ៉្វាន់ដា បានត្រៀមខ្លួនរួចជាស្រេចដើម្បី «ដោះស្រាយ»ការប្រឈមមុខដាក់គ្នាណាមួយដែលអាចកើតមាន ជាមួយប្រទេសអាហ្វ្រិកខាងត្បូង ប្រសិនបើជម្លោះកើនឡើងនៅភាគខាងកើតសាធារណរដ្ឋប្រជាធិបតេយ្យកុងហ្គោ។

ជម្លោះដ៏រ៉ាំរ៉ៃ នៅប្រទេសកុងហ្គោ កាន់តែតានតឹងក្នុងសប្តាហ៍ចុងក្រោយនេះ ដោយក្រុមឧទ្ទាម M23 ដណ្តើមយកបានទីក្រុងយុទ្ធសាស្ត្រ Goma។

ប្រទេសកុងហ្គោ អាហ្រ្វិកខាងត្បូង និងប្រទេសផ្សេងទៀត បានចោទប្រកាន់ប្រទេសរ៉្វាន់ដា ថាបានគាំទ្រក្រុមឧទ្ទាម M23 ។

លោក Kagame បានច្រានចោលការរិះគន់ជុំវិញតួនាទីរបស់ប្រទេសលោក នៅក្នុងជម្លោះនេះ។ ក្នុងអំឡុងពេលកិច្ចប្រជុំកំពូលតាមអ៊ីនធឺណិតនៃមេដឹកនាំអាហ្វ្រិកខាងកើត លោក Kagame បានចោទប្រកាន់ប្រធានាធិបតីអាហ្វ្រិកខាងត្បូង លោក Cyril Ramaphosa ពីការបកស្រាយមិនត្រឹមត្រូវនៃការសន្ទនាថ្មីៗនេះ អំពីជម្លោះ។

ប្រទេសរ៉្វាន់ដា កំពុងប្រឈមមុខនឹងការរិះគន់ជាអន្តរជាតិ ជុំវិញចំណាត់ការរបស់ខ្លួននៅភាគខាងកើតប្រទេសកុងហ្គោ។