រដ្ឋមន្ត្រីក្រសួងដឹកជញ្ជូនរបស់សហរដ្ឋអាមេរិក លោក សន ឌូហ្វី (Sean Duffy) បាននិយាយកាលពីល្ងាចថ្ងៃព្រហស្បតិ៍ (៣០ មករា) ថា លោកនឹងប្រកាសពីផែនការធ្វើកំណែទម្រង់រដ្ឋបាលអាកាសចរណ៍សហព័ន្ធ FAA ក្នុងពេលឆាប់ៗនេះ បន្ទាប់ពីគ្រោះថ្នាក់ផ្លូវអាកាសដ៏អាក្រក់រវាងយន្តហោះក្រុមហ៊ុនអាកាសចរណ៍អាមេរិក និងឧទ្ធម្ភាគចក្រកងទ័ព សម្លាប់មនុស្ស ៦៧នាក់។

លោក Duffy បាននិយាយនៅលើបណ្ដាញសង្គម X ថា "យើងកំពុងស្ថិតក្នុងដំណើរការបង្កើតផែនការដំបូងដើម្បីជួសជុល និងកែទម្រង់ FAA ហើយយើងសង្ឃឹមថានឹងដាក់ចេញក្នុងពេលឆាប់ៗនេះ"។ លោកប្រធានាធិបតី Donald Trump ដែលបានរិះគន់យ៉ាងខ្លាំងទៅលើកិច្ចខិតខំប្រឹងប្រែងនៃភាពចម្រុះជំនាញនៅ FAA បានស្ដីបន្ទោសភ្នាក់ងារនេះភ្លាមៗជុំវិញឧប្បត្តិហេតុនេះ។

នៅមុននោះ លោក Trump បានតែងតាំងអតីតមន្ត្រីអាកាសចរណ៍ជាន់ខ្ពស់ម្នាក់ជាប្រធានស្តីទី FAA តែមួយថ្ងៃប៉ុណ្ណោះបន្ទាប់ពីមហន្តរាយអាកាសដ៏កាចសាហាវបំផុតរបស់អាមេរិក ក្នុងពេលជាង ២០ឆ្នាំ។

ការប្រកាសនេះបានធ្វើឡើងបន្ទាប់ពីយន្តហោះដឹកអ្នកដំណើរក្នុងស្រុករបស់ក្រុមហ៊ុនអាកាសចរណ៍ American Airlines បានបុកជាមួយឧទ្ធម្ភាគចក្រ Black Hawk របស់កងទ័ពអាមេរិក ហើយបានធ្លាក់ចូលទៅក្នុងទន្លេ Potomac ក្បែរអាកាសយានដ្ឋានជាតិ Reagan ទីក្រុងវ៉ាស៊ីនតោន សម្លាប់មនុស្សទាំងអស់លើយន្តហោះទាំងពីរ៕