ភ្នំពេញ ៖ ក្រសួងវប្បធម៌ និងវិចិត្រសិល្បៈ បានចេញសេចកី្តជូនព័ត៌មាននាថ្ងៃទី១១ ខែវិចិ្ឆកា ឆ្នាំ២០២១នេះ ស្តីពីការទទួលបានមកវិញនូវវត្ថុបុរាណខ្មែរចំនួន០៤រូប ពីសារមនី្ទរសិល្បៈ Denver នៅសហរដ្ឋអាមេរិក ដែលបានប្រគល់ជូនព្រះរាជាណាចក្រកម្ពុជាវិញ។

 យោងតាមសេចកី្តជូនព័ត៌មានរបស់ក្រសួងវប្បធម៌ និងវិចិត្រសិល្បៈ បានបញ្ជាក់ថា ដោយអនុលោមតាមអនុស្សរណៈនៃការយោគយល់គ្នារវាងរាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិក វត្ថុបុរាណខ្មែរ ចំនួន០៤រូប នឹងត្រូវប្រគល់មកកម្ពុជាវិញ នាពេលខាងមុខនេះ។ រដ្ឋាភិបាលសហរដ្ឋអាមេរិក តាមរយៈការិយាល័យរដ្ឋអាជ្ញាសហរដ្ឋ អាមេរិក ប្រចាំសង្កាត់ភាគខាងត្បូង នៃទីក្រុងញូវយ៉ក (USAO-SDNY) និងការិយាល័យស៊ើបអង្កេតសន្តិសុខមាតុភូមិ សហរដ្ឋអាមេរិក (HSI) បានដំណើរការក្តីក្នុងតុលាការ ពាក់ព័ន្ធនឹងសម្បតិ្តវប្បធម៌ខ្មែរ ចំនួន០៤រូប ដែលត្រូវបានរឹបអូសពីសារមនី្ទរសិល្បៈ Denver នៅសហរដ្ឋអាមេរិក។

 វត្ថុបុរាណខ្មែរទាំង០៤រូបនេះ រួមមាន៖

១.ចម្លាក់ព្រះនាងប្រាជ្ញាបារមិតា ថ្មភក់ សម័យអង្គរ រចនាបថបាយ័ន្ត ចុងសតវត្សរ៍ទី១២ ដើមទី១៣។ យោងតាមព័ត៌មានពីសាក្សី បដិមានេះ ត្រូវបានគេរកឃើញនៅក្នុងវាលស្រែក្បែរប្រាសាទបុរាណមួយ ក្នុងខេត្តតាកែវ មិនឆ្ងាយពីតំបន់ទន្លេបាទី។

២.ចម្លាក់ព្រះសូរ្យ ថ្មភក់ សម័យមុនអង្គរ សតវត្សរ៍ទី៧-៨។ តាមសេចកី្តរាយការណ៍ពីសាក្សី បដិមានេះត្រូវបានលួចចេញពីប្រាសាទមួយ នៅលើភ្នំគូលែន។

៣.ជួងសំរិទ្ធ សម័យបុរេប្រវតិ្ត។ តាមសេចកី្តរាយការណ៍ពីសាក្សី ជួងនេះ គឺជាវត្ថុមួយក្នុងចំណោមជួងសំរិទ្ធ ចំនួន១២ (រៀបជារង្វង់មូលព័ន្ធជុំវិញថ្មគោលមួយ) ដែលត្រូវបានរកឃើញនៅតំបន់មួយនៃខេត្តពោធិ៍សាត់ និងខេត្តបាត់ដំបង។

៤.ផ្តែរព្រះនារាយណ៍ផ្ទុំ ថ្មភក់ សម័យមុនអង្គរ សតវត្សរ៍ទី៧-៨។ តាមប្រភពពីសាក្សីបានឲ្យដឹងថា ផ្តែរនេះ ត្រូវបានយកចេញពីប្រាសាទមួយនៅលើភ្នំគូលែន ដែលមានលក្ខណៈស្រដៀងនឹងផ្តែរនៅប្រាសាទសំបូរព្រៃគុក ក្នុងខេត្តកំពង់ធំ។

លោកជំទាវ បណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានថ្លែងថា យើងទាំងអស់គ្នាមានសេចកី្តរំភើបរីករាយ ក្នុងការបន្តស្វាគមន៍រតនៈសម្បតិ្តដ៏មានតម្លៃទាំងនេះត្រឡប់មកព្រះរាជាណាចក្រកម្ពុជាវិញ ហើយមានមោទនភាពចំពោះកិច្ចសហការរបស់យើងជាមួយរដ្ឋាភិបាលសហរដ្ឋអាមេរិក។ លទ្ធផលដែលទទួលបានជាបន្តបន្ទាប់នេះ ក៏ដោយសារកម្ពុជាយើងមានសុខសន្តិភាពពេញលេញ តាមរយៈនយោបាយឈ្នះឈ្នះរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា ដោយផ្តល់ឱកាសដល់ការវិលត្រឡប់មកវិញ នៃព្រលឹងបុព្វបុរសខ្មែរ ដែលបានរសាត់ចាកឆ្ងាយពីមាតុភូមិកំណើតអស់ជាច្រើនឆ្នាំមកហើយនាសម័យសង្រ្គាម។

 លោកជំទាវ បណ្ឌិតសភាចារ្យ ភឿង សកុណា បានអំពាវនាវដល់សារមនី្ទរ និងអ្នកប្រមូលសមុច្ច័យឯកជននានា ដែលកាន់កាប់រក្សាទុកសម្បតិ្តវប្បធម៌ខ្មែរ សូមទាក់ទងមកក្រសួងវប្បធម៌ និងវិចិត្រសិល្បៈ ដើម្បីចែករំលែកឯកសារពាក់ព័ន្ធ និងប្រគល់សម្បតិ្តវប្បធម៌ទាំងនោះដោយស្ម័គ្រចិត្តមកកម្ពុជាវិញ។ ក្រសួងកំពុងបន្តប្រមូលភស្តុតាង នៃការលួចនាំចេញ និងការកាន់កាប់ដោយខុសច្បាប់នូវសម្បតិ្តវប្បធម៌ខ្មែរ។ ជាមួយនេះ ក្រសួងសូមអបអរសាទរចំពោះកិច្ចសហការរបស់រដ្ឋាភិបាលសហរដ្ឋអាមេរិក ក្នុងការបញ្ជូនមកកម្ពុជាវិញនូវសម្បតិ្តវប្បធម៌ខ្មែរ និងថ្លែងអំណរគុណដោយស្មោះចំពោះការខិតខំប្រឹងប្រែងរបស់ការិយាល័យរដ្ឋអាជ្ញាសហរដ្ឋអាមេរិក ការិយាល័យស៊ើបអង្កេតសន្តិសុខមាតុភូមិសហរដ្ឋអាមេរិក និងអាជ្ញាធរពាក់ព័ន្ធទាំងអស់ ទាំងនៅក្នុង និងក្រៅប្រទេស ស្ថានទូតសហរដ្ឋអាមេរិកប្រចាំកម្ពុជា និងក្រុមការងាររបស់ក្រសួង ជាពិសេសចំពោះលោក Bradley J. Gordon និងSteven Heimberg។ បន្ថែមពីលើនោះ លោកជំទាវ រដ្ឋមន្រី្ត ក៏បានបញ្ជាក់អំពីតម្លៃនៃកិច្ចសហប្រតិបតិ្តការ និងការខិតខំប្រឹងប្រែងរួមគ្នា នៃប្រទេសទាំងពីរ ក្នុងការការពារសម្បតិ្តបេតិកភណ្ឌវប្បធម៌ និងអត្តសញ្ញាណជាតិ ដើម្បីជាឧត្តមប្រយោជន៍សម្រាប់ប្រជាជនកម្ពុជា និងមនុស្សជាតិទូទៅ៕អត្ថបទ៖ រដ្ឋា