ក្រសួងការបរទេសរបស់ប្រទេសរូម៉ានី បានអះអាងជាថ្មីនូវការគាំទ្ររបស់ខ្លួន ចំពោះប្រទេសអ៊ុយក្រែន ពោលគឺមួយថ្ងៃបន្ទាប់ពីបេក្ខជនអតីតប្រធានាធិបតី បាននិយាយថា ប្រទេសនេះ គឺជា «រដ្ឋដែលត្រូវបានបង្កើត» ដែលគួរតែត្រូវបានបែងចែកឲ្យទៅប្រទេសជិតខាងរបស់ខ្លួន ក្នុងនោះរួមទាំងប្រទេសប៉ូឡូញផងដែរ។

លោក Călin Georgescu (ខាលីន ចចជេកូ) បានទទួលជ័យជម្នះដ៏គួរឲ្យភ្ញាក់ផ្អើលជាមួយនឹងសំឡេងយ់ាងច្រើនលើសលប់ នៅក្នុងការបោះឆ្នោតប្រធានាធិបតី កាលពីខែធ្នូឆ្នាំមុន ដែលក្រោយមកត្រូវបានបដិសេធដោយហេតុផលមានការជ្រៀតជ្រែកពីរុស្ស៊ី។

អំឡុងបទសម្ភាសន៍មួយ កាលពីថ្ងៃពុធ (ទី២៩ ខែមករា) លោក Georgescu ដែលគាំទ្រទីក្រុងមូស្គូ បាននិយាយថា លោកចង់ឲ្យអ៊ុយក្រែនត្រូវបានបែងចែក បន្ទាប់ពីរុស្ស៊ីមានជ័យជម្នះនៅក្នុងសង្គ្រាម ហើយផ្នែកនៃដែនដីរបស់ប្រទេសនេះ គួរតែបានទៅប្រទេសរ៉ូម៉ានី ប៉ូឡូញ និងហុងគ្រី។

ដោយមិនបញ្ចេញឈ្មោះលោក Georgescu ក្រសួងការបរទេស នៅទីក្រុង Bucharest (ប៊ុយការ៉េស) បានចេញសេចក្តីថ្លែងការណ៍មួយកាលពីថ្ងៃព្រហស្បតិ៍ (ទី៣០ ខែមករា) ដោយលើកឡើងថា៖ «ក្រសួងការបរទេសរ៉ូមានី បញ្ជាក់ជាថ្មីនូវជំហរដ៏រឹងមាំ ក្នុងការគាំទ្រអធិបតេយ្យភាព បូរណភាពទឹកដី និងឯករាជ្យភាពរបស់អ៊ុយក្រែន ក្នុងរង្វង់ព្រំដែនដែលត្រូវបានទទួលស្គាល់ជាអន្តរជាតិរបស់ប្រទេសនេះ»។

ក្រសួងបានបន្ថែមថា៖ «ជំហរនេះ គឺច្បាស់លាស់ និងចាក់ឫសយ៉ាងជ្រៅ ក្នុងច្បាប់អន្តរជាតិ ផលប្រយោជន៍ជាតិ និងគោលនយោបាយការបរទេស ផ្អែកលើតម្លៃយូរអង្វែង»៕