បាត់ដំបង ៖ នាព្រឹកថ្ងៃទី៣១ ខែមករា ឆ្នាំ២០២៥ ឯកឧត្តម ទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បន្តអញ្ជើញដឹកនាំក្រុមការងារ អាជ្ញាធរខេត្តបាត់ដំបង និងមន្ទីរ-អង្គភាពពាក់ព័ន្ធ ដើម្បីពិនិត្យដំណាំស្រូវរបស់កសិករចំនួនជាង១ពាន់ហិកតា ស្ថិតក្នុងឃុំហប់ នៃស្រុកគាស់ក្រឡ ខេត្តបាត់ដំបង។ 

ក្នុងពេលចុះពិនិត្យ ឯកឧត្តម ទេសរដ្ឋមន្រ្តី បានវាយតម្លៃខ្ពស់ចំពោះការយកចិត្តទុកដាក់របស់អាជ្ញាធរខេត្ត និងមន្ទីរជំនាញ ដែលបានចុះជួបជាមួយប្រជាកសិករ ក្នុងការពិនិត្យ និងឆ្លើយតបពីបញ្ហាដែលកំពុងប្រឈមដោយសារការកង្វះទឹកស្រោចស្រពដែលអាចខូចខាតដំណាំទាំងស្រុងរបស់កសិករ។ ឯកឧត្តម ទេសរដ្ឋមន្រ្តី ពិនិត្យឃើញថាដំណាំស្រូវក្នុងឃុំហប់នេះ មិនអាចសង្គ្រោះបានឡើយ ដោយសារមិនមានប្រព័ន្ធធារាសាស្រ្តណាមួយដែលអាចជួយអន្តរាគមន៍ទឹកនោះទេ។ 

ឯកឧត្តម ទេសរដ្ឋមន្រ្តី បញ្ជាក់ថា ក្នុងនាមគណៈកម្មាធិការជាតិគ្រប់គ្រងគ្រោះមហន្តរាយ ជាសេនាធិការរបស់រាជរដ្ឋាភិបាល នឹងលើកសំណើទៅក្រសួងធនធានទឹក និងឧតុនិយម ក្រសួងអភិវឌ្ឍន៍ជនបទ ដើម្បីរៀបចំជួសជុល ស្តារប្រព័ន្ធធារាសាស្រ្ត ដើម្បីបញ្ជូនទៅដំណាំស្រូវឡើងវិញ។ 

ជាចុងបញ្ចប់ ឯកឧត្តម ទេសរដ្ឋមន្រ្តី បានណែនាំដល់អាជ្ញាធរ និងមន្ទីរជំនាញបន្តការយកចិត្តទុកដាក់លើសកម្មភាពអន្តរាគមន៍ផ្តល់ទឹកស្រូវប្រាំងរបស់កសិករគ្រប់ៗគ្នា ដើម្បីបង្ការការខូចខាតដំណាំស្រូវ។ 

សូមជម្រាបថា ខេត្តបាត់ដំបង មានផ្ទៃដីស្រូវប្រាំងចំន៩០២១១ហិកតា ស្មើនឹង ៣៣៤% នៃផែនការចំនួន២៧០០០ហិកតា ។ 

- ប៉ះពាល់ ៨៩៣៣ហិកតា

- សង្រ្គោះបាន ១៩៩០ហិកតា

- ខូចខាត ៣៩៩៥ហិកតា។