​

មន្ត្រីក្នុងតំបន់បាននិយាយថា កងកម្លាំងរុស្ស៊ី បានបើកការវាយប្រហារដោយមីស៊ីល ទៅលើមជ្ឈមណ្ឌលប្រវត្តិសាស្ត្រនៃកំពង់ផែសមុទ្រខ្មៅ Odesa របស់ប្រទេសអ៊ុយក្រែន ដែលជាទីតាំងបេតិកភណ្ឌពិភពលោករបស់អង្គការយូណេស្កូ ដោយបានបំផ្លាញអគារ និងធ្វើឲ្យមនុស្សពីរនាក់រងរបួស។

វីដេអូ និងរូបភាព ដែលត្រូវបានផ្តល់ឲ្យដោយអង្គភាពសេវាសង្គ្រោះបន្ទាន់របស់រដ្ឋអ៊ុយក្រែន ក្នុងតំបន់ Odesa កាលពីថ្ងៃសុក្រ បង្ហាញពីអគារនិងយានយន្តត្រូវបានបំផ្លាញ ហើយក្រុមអ្នកឆ្លើយតបដំបូង បានទៅដល់កន្លែងកើតហេតុ។ សារព័ត៌មាន Reuters អាចផ្ទៀងផ្ទាត់ទីតាំងដោយឯករាជ្យជាមួយនឹងការតុបតែងខាងក្នុង និងការរចនាអគារ ដែលត្រូវគ្នាជាមួយឯកសារ និងរូបភាពផ្កាយរណបនៅតំបន់នោះ។

រូបភាពជាច្រើន ដែលបានបង្ហោះតាមបណ្តាញអ៊ីនធឺណិត បង្ហាញពីការខូចខាតសណ្ឋាគារ Bristol ជាសណ្ឋាគាររប្រណិត ដែលត្រូវបានសាងសង់នៅចុងសតវត្សរ៍ទី១៩ ព្រមទាំងបំណែករាយប៉ាយនៅតាមដងផ្លូវ។

អភិបាលក្រុង Odesa លោក ហេនណាឌី ទ្រូខានណូវ(Hennadiy Trukhanov) បានសរសេរនៅលើកម្មវិធីផ្ញើសារ Telegram ថា មនុស្សពីរនាក់បានរងរបួសក្នុងការវាយប្រហារ ហើយត្រូវបានបញ្ជូនទៅមន្ទីរពេទ្យ។

អភិបាលតំបន់លោក Oleh Kiper បាននិយាយថា ការផ្ទុះខ្លាំងចំនួនពីរលើក ត្រូវបានលាន់លឺនៅក្នុងទីក្រុង។