ភ្នំពេញ៖ រដ្ឋបាលខណ្ឌ៧មករា បន្តការយកចិត្តទុក ពីបញ្ហាការផ្លាស់ប្ដូរ ប្រព័ន្ធលូបង្ហូរទឹក ជួសជុលផ្លូវជង្ហុកសំបុកមាន់ និងការ៉ូឡាលើចិញ្ជើមផ្លូវជាដើម ដើម្បីបម្រើប្រយោជន៍សាធារណៈ ជូនដល់ប្រជាពលរដ្ឋ ក្នុងមូលដ្ឋាន និងសាធារណៈជន តាមការណែនាំរបស់រដ្ឋបាលរាជធានីភ្នំពេញ ដែលមានឯកឧត្តម ឃួង ស្រេង ជាអភិបាលនៃគណៈអភិបាលរាជធានីភ្នំពេញ។

ជាក់ស្ដែង នាព្រឹកថ្ងៃទី១ ខែកុម្ភៈ ឆ្នាំ២០២៥នេះ លោក ថេង សុថុល អភិបាលខណ្ឌ៧មករា បានដឹកនាំមន្រ្តីជំនាញពាក់ព័ន្ធ ចុះពិនិត្យផ្ទាល់នៅការដ្ឋានដាក់ប្រព័ន្ធលូ រំដោះទឹកមួយខ្សែរ ស្ថិតនៅកំណាត់ផ្លូវលេខ១៦៩ ក្បែរស្តុប នាងគង្ហីង មូលដ្ឋានសង្កាត់វាលវង់ ខណ្ឌ៧មករា រាជធានីភ្នំពេញ។

ក្នុងនោះដែរលោកអភិបាលខណ្ឌបានបញ្ជាក់ប្រាប់BTVឲ្យដឹងថានៅកំណាត់ផ្លូវលេខ១៦៩ នេះកន្លងមកគឺពុំមានប្រព័ន្ធលូរំដោះទឹកនោះទេ។ដូច្នេះក្នុងគម្រោង៣ឆ្នាំរំកិលរបស់សង្កាត់វាលវង់ បានគិតគូរនិងបានដាក់ប្រព័ន្ធលូទំហំមុខកាត់០៨តឹក ដើម្បីរំដោះទឹកនាដូវវស្សាជៀសវាងបង្កការលិចឬដកទឹកនៅលើកំណាត់ផ្លូវ ដែលអាចធ្វើឲ្យខូចផ្លូវផងដែរ។ 

ពេលចុះត្រួតពិនិត្យមើលការដ្ឋាននេះដែរ អភិបាលក៏បានណែនាំទៅដល់ម្ចាស់ម៉ៅការក្នុងគម្រោងនេះឲ្យយកចិត្តទុកដាក់ពីផលប៉ះពាល់ដល់ប្រជាពលរដ្ឋ រស់នៅកំណាត់ផ្លូវនេះដោយធ្វើយ៉ាងណាគឺកាត់បន្ថយប៉ះពាល់បានច្រើនហើយនិងធ្វើឲ្យមានត្រឹមត្រូវតាមលក្ខណៈបច្ចេកទេស។

ជាចុងក្រោយអភិបាលខណ្ឌ សំណូមពរដល់ពលរដ្ឋ ក៏ដូចជាសាធារណៈជនធ្វើដំណើរឆ្លងកាត់តំបន់ ការដ្ឋានកំពុងដំណើរការ មានការយោគយល់និងអធ្យាស្រ័យ ចំពោះការកក់ស្ទះចរាចរណ៍។ ជាពិសេសសំណូមពរ ឲ្យមានការវិចខ្ចប់សម្រាមនិងបញ្ជេញសម្រាមឲ្យទៀងម៉ោងត្រឹមត្រូវកុំបោះចោលផ្ដេសផ្ដាស់៕

អត្ថបទ៖ កុម្ភៈ