បើយោងតាមការវិភាគទិន្នន័យបុគ្គលិកពីសហជីពតំណាងឲ្យអ្នកត្រួតពិនិត្យ ដែលសារព័ត៌មាន The New York Times ទទួលបាន បានបង្ហាញថា ជាង ៩០ភាគរយនៃទីកន្លែងត្រួតពិនិត្យចរាចរណ៍ផ្លូវអាកាសចំនួន ៣១៣កន្លែងរបស់សហរដ្ឋអាមេរិក ដំណើរការទៅដោយមានកម្រិតបុគ្គលិកទាបជាងការណែនាំរបស់រដ្ឋបាលអាកាសចរណ៍សហព័ន្ធ (FAA)។

គិតត្រឹមខែមករា ទីតាំងចំនួន ២៨៥កន្លែង ដែលរួមមានប៉មត្រួតពិនិត្យចរាចរណ៍ និងទីតាំងផ្សេងទៀត ស្ថិតនៅក្រោមកម្រិតបុគ្គលិកច្រើនបំផុតដែលកំណត់ដោយ FAA និងសហជីព។ សម្រាប់ ៧៣កន្លែងនៃទីតាំងទាំងនោះ បុគ្គលិកមានកម្រិតទាបណាស់ ដែលយ៉ាងហោចណាស់បាត់កម្លាំងការងារ ១ភាគ៤។

ប្រព័ន្ធចរាចរណ៍តាមផ្លូវអាកាសរបស់សហរដ្ឋអាមេរិក នៅតែស្ថិតក្នុងចំណោមការធ្វើដំណើរដ៏សុវត្ថិភាពបំផុត ក្នុងពិភពលោក។ ប៉ុន្តែកង្វះខាតបុគ្គលិកដ៏យូរអង្វែង និងការវិនិយោគមិនគ្រប់គ្រាន់ ក្នុងប្រព័ន្ធសុវត្ថិភាព បាននាំឲ្យមានការកើនឡើងដ៏គួរឲ្យបារម្ភនូវការពិបាកទាក់ទងប្រកាសអាសន្ន ពេលយន្តហោះជិតមានគ្រោះថ្នាក់។ FAA មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ ពាក់ព័ន្ធនឹងករណីនេះ។

យ៉ាងណាក្ដី ការធ្វើឲ្យបញ្ហានេះប្រសើរឡើង ប្រហែលជាមិនកើតឡើងយ៉ាងឆាប់រហ័សនោះទេ។ វាអាចចំណាយពេលជាង ៤ឆ្នាំ ដើម្បីបណ្តុះបណ្តាលបុគ្គលិកគ្រប់គ្រងចរាចរណ៍ផ្លូវអាកាសថ្មី នៅទីកន្លែងមួយចំនួន។ ទិន្នន័យបានបង្ហាញថា នៅឯអាកាសយានដ្ឋានជាតិ Ronald Reagan Washington ជាកន្លែងដែលមានយន្តហោះធ្លាក់ក្នុងសប្តាហ៍នេះ ការបណ្ដុះបណ្ដាលត្រូវចំណាយពេលជិត ១៦ខែ៕