អង្គការសហប្រជាជាតិ (UN) បានអំពាវនាវឲ្យមាន «កិច្ចប្រឹងប្រែងការទូតគ្រប់យ៉ាង» ដើម្បីបញ្ចប់អរិភាពនៅភាគខាងកើតនៃសាធារណរដ្ឋប្រជាធិបតេយ្យកុងហ្គោ (DRC) និងទប់ស្កាត់កុំឲ្យជម្លោះកាន់តែរីករាលដាល នាពេលខាងមុខ។

អគ្គលេខាធិការរងរបស់ UN ទទួលបន្ទុកប្រតិបត្តិការសន្តិភាព លោក Jean-Pierre Lacroix បានប្រាប់អ្នកសារព័ត៌មាន អំពីស្ថានភាពចុងក្រោយបង្អស់ក្នុងប្រទេសនេះ នៅឯទីស្នាក់ការ UN នាទីក្រុងញូវយ៉ក សហរដ្ឋអាមេរិក កាលពីថ្ងៃសុក្រ (ទី៣១ ខែមករា) ខណៈដែលក្រុមចលនា ២៣ មីនា (M23) និងកងកម្លាំងការពារជាតិរ៉្វាន់ដា (RDF) បានបន្តរុលទៅមុខឆ្ពោះទៅកាន់ទីក្រុង Bukavu បន្ទាប់ពីបានគ្រប់គ្រងទីក្រុង Goma ដែលជារដ្ឋធានីនៃខេត្ត North Kivu។

ប្រមុខរក្សាសន្តិភាពរបស់ UN បាននិយាយថា ស្ថានភាពនៅក្នុងទីក្រុង Goma នៅតែ «តានតឹង និងប្រែប្រួលមិនទៀងទាត់» ដោយការបាញ់ប្រហារម្តងម្កាល នៅតែបន្តមាននៅក្នុងរង្វង់ទីក្រុងនេះ តែបានបន្ថែមថា ជារួម ភាពស្ងប់ស្ងាត់បានចាប់ផ្ដើមមានឡើងវិញជាបណ្តើរៗ។

លោក Lacroix បានបន្តថា ទឹក និងអគ្គិសនី ត្រូវបានផ្គង់ផ្គង់ឡើងវិញនៅក្នុងទីក្រុងជាច្រើន ប៉ុន្តែបញ្ហាប្រឈមនៃយុទ្ធភណ្ឌមិនទាន់ផ្ទុះ បានផ្ដល់ការលំបាកយ៉ាងខ្លាំងដល់ការធ្វើដំណើរដោយសេរីរបស់មនុស្សម្នា។ ហើយលោកក៏បានព្រមានអំពីវិបត្តិមនុស្សធម៌ដែលកាន់តែអាក្រក់ឡើងៗ ដោយមានបញ្ហាប្រឈមធ្ងន់ធ្ងរ ពាក់ព័ន្ធនឹងទឹកស្អាត ការផ្គត់ផ្គង់អាហារ និងអនាម័យ។

លោកបានសង្កត់ធ្ងន់ថា ការចូលរួមការទូត និងការសន្ទនា នៅតែជាមធ្យោបាយដោះស្រាយដ៏មានប្រសិទ្ធភាពតែមួយគត់ ដោយអំពាវនាវឲ្យបញ្ឈប់ការប្រយុទ្ធគ្នា តាមរយៈការមានមធ្យោបាយនយោបាយ និងការទូត ដើម្បីទប់ស្កាត់ជម្លោះកុំឲ្យរីករាលដាលកាន់តែធំទៅៗ នៅក្នុងតំបន់៕