បុគ្គលិកពេទ្យ កាលពីថ្ងៃសុក្រ (ទី៣១ ខែមករា) បាននិយាយថា មន្ទីរពេទ្យមួយកន្លែង ក្នុងទីក្រុង Goma កំពុងជួបការលំបាក ក្នុងការដោះស្រាយជាមួយនឹងអ្នករបួសជនស៊ីវិលដ៏ច្រើនសន្ធឹកសន្ធាប់ ពោលគឺប៉ុន្មានថ្ងៃបន្ទាប់ពីក្រុមឧទ្ទាម M23 បានដណ្តើមកាន់កាប់ទីក្រុងភាគខាងកើតរបស់ប្រទេសកុងហ្គោ។

ជាមួយគ្នានេះ គណៈកម្មាធិការអន្តរជាតិនៃកាកបាទក្រហម (ICRC) បានរាយការណ៍ថា បានទទួលព្យាបាលអ្នកជំងឺជាង ១.០០០នាក់ នៅឯមជ្ឈមណ្ឌលវេជ្ជសាស្ត្រមូលដ្ឋានមួយកន្លែង ចាប់តាំងពីអំពើហិង្សា បានផ្ទុះឡើង។

បើយោងតាម លោក Emmanuel Kone ប្រធានកម្មវិធីវះកាត់របស់ ICRC នៅភាគខាងកើតកុងហ្គោ បានឲ្យដឹងថា មន្ទីរពេទ្យបានទទួលអ្នកជំងឺថ្មីជាង ៨០នាក់ជារៀងរាល់ថ្ងៃ ក្នុងនោះមានរួមទាំងស្ត្រី កុមារ និងស្ត្រីមានផ្ទៃពោះផងដែរ។

ចំនួនអ្នករបួសដ៏ច្រើនជ្រុលនេះ បានកើតមានឡើង ក្នុងពេលដែលទីក្រុង Goma នៅតែមានភាពតានតឹង បន្ទាប់ពីក្រុមឧទ្ទាម M23 បានដណ្ដើមកាន់កាប់ទីក្រុងនេះ កាលពីដើមសប្តាហ៍។ កងទ័ពកុងហ្គោ និងសម្ព័ន្ធមិត្តរបស់ខ្លួន ត្រូវបានគេរាយការណ៍ថា កំពុងវាយរុញច្រានការរុលទៅភាគខាងត្បូងរបស់ក្រុមឧទ្ទាមឆ្ពោះទៅកាន់ទីក្រុង Bukavu។ ស្ថានភាពមនុស្សធម៌ ក្នុងទីក្រុង Goma នៅតែស្ថិតក្នុងស្ថានភាពធ្ងន់ធ្ងដដែល៕