ករណីមានប្រេងអណ្តែតមកលើឆ្នេរព្រែកត្រែង ស្ថិតនៅភូមិ៣ សង្កាត់លេខ១ ក្រុងព្រះសីហនុ និងឃុំអូរត្រេះ ស្រុកស្ទឹងហាវ ខេត្តព្រះសីហនុ នៅថ្ងៃទី១ ខែកុម្ភៈ ឆ្នាំ២០២៥ រដ្ឋបាលខេត្តព្រះសីហនុ អំពាវនាវប្រជាពលរដ្ឋ និងភ្ញៀវទេសចរផ្អាកចុះលេងទឹកជាបណ្តោះអាសន្ន នៅឆ្នេរព្រែកត្រែង។

បន្ទាប់ពីទទួលបានព័ត៌មាន ពីករណីមានប្រេងអណ្តែតមកលើឆ្នេរព្រែកត្រែង ឯកឧត្តមអភិបាល នៃគណៈអភិបាលខេត្ត បានដឹកនាំមន្ទីរអង្គភាពពាក់ព័ន្ធ អាជ្ញាធរក្រុងព្រះសីហនុ ស្រុកស្ទឹងហាវ និងឃុំ សង្កាត់ ដោយមានការចូលរួមសហការពីតំណាងក្រសួងបរិស្ថាន និងក្រសួងរ៉ែ និងថាមពល ចុះពិនិត្យទីតាំងជាក់ស្តែង ដើម្បីស្វែងរកប្រភព នៃការលេចធ្លាយប្រេងនៅលើផ្ទៃសមុទ្រ និង​បានចាត់​កំលាំង​ធ្វើការសម្អាតប្រេង​នៅតាមបណ្តោយឆ្នេរ និង​តាមទីតាំងមួយចំនួនទៀត​ដែលមាន​កក់កំណកប្រេង។ ចំពោះមុខរដ្ឋបាលខេត្ត សូមអំពាវនាវដល់បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិ ដែលមកកំសាន្តនៅឆ្នេរព្រែកត្រែង ​សូមផ្អាកចុះលេងទឹកជាបណ្តោះអាសន្ន ដើម្បី​ទុកលទ្ធភាព​ជូនក្រុមការងារធ្វើការសម្អាត ​និង​ចៀសវាង​ផលប៉ះពាល់ផ្សេងៗ។ ចំពោះករណីនៃបញ្ហានេះ​ និងផលប៉ះពាល់រង់ចាំក្រសួងបរិស្ថាន ​និងក្រសួងរ៉ែថាមពល ដែលកំពុងធ្វើការ រួចនឹងប្រកាសព័ត៌មាន ។

ករណីនេះ ភ្នាក់ងារទូរទស្សន៍ប៊ីធីវី កំពុងព្យាយាមទាក់ទងទៅអ្នកនាំពាក្យក្រសួងបរិស្ថាន ដើម្បីសុំរបាយការណ៍ព័ត៌មានបញ្ជាក់បន្ថែមប្រភពកើតហេតុ និងផលប៉ះពាល់ ព្រមទាំងវិធានការ រួមទាំងទំនួលខុសត្រូវចំពោះករណីនេះ ដោយសារក្រសួងទាំងពីរកំពុងធ្វើការលើករណីនេះ មិន​ទាន់ឆ្លើយតបនៅឡើយទេ។ នៅពេលបានទទួលសេចក្ដីប្រកាសព័ត៌មាន ឬការឆ្លើយតបយ៉ាងណាពី​ក្រសួងបរិស្ថាន ទូរទស្សន៍ប៊ីធីវី នឹងធ្វើការផ្សាយជូនបន្ថែមទៀត៕