បាតុកររាប់ម៉ឺននាក់បានចេញតវ៉ាតាមផ្លូវនានាក្នុងប្រទេសស៊ែរប៊ី ដើម្បីប្រារព្ធរយៈពេលបីខែ ចាប់តាំងពីការបាក់រលំដំបូលស្ថានីយ៍រថភ្លើងក្នុងទីក្រុង Novi Sad ព្រមទាំងបានជំរុញឱ្យមានចលនាប្រឆាំងអំពើពុករលួយ។

មនុស្សរាប់ម៉ឺននាក់បានដើរដង្ហែក្បួនពាសពេញទីក្រុងភាគខាងជើងនៃប្រទេសស៊ែរប៊ីកាលពីថ្ងៃសៅរ៍ ដោយគ្រវីទង់ជាតិ និងស្លាកសញ្ញាផ្សេងៗ ខណៈបានបិទផ្លូវ និងកាន់កាប់ស្ពានសំខាន់ៗចំនួនបីរបស់ទីក្រុងមួយនេះ។

និស្សិតទស្សនវិជ្ជាម្នាក់បានប្រាប់ទីភ្នាក់ងារព័ត៌មាន AFP ថា គ្មានការថយក្រោយ គ្មានការភ័យខ្លាចទេ ហើយយើងនឹងមិនបោះបង់ចោលឡើយ ។

ក្រុមនិស្សិតមកពីតាមសាកលវិទ្យាល័យនានាបានដឹកនាំចលនាតវ៉ា ហើយបាននិងកំពុងបិទសាលានៅទូទាំងប្រទេសចាប់តាំងពីការបាក់រលំដំបូលស្ថានីយ៍រថភ្លើងដែលបានសម្លាប់មនុស្ស១៥ នាក់កាលពីថ្ងៃទី ១ ខែវិច្ឆិកាឆ្នាំ២០២៤។

មនុស្សជាច្រើននៅក្នុងប្រទេសស៊ែរប៊ីជឿថាការដួលរលំគឺបណ្តាលមកពីអំពើពុករលួយរបស់រដ្ឋាភិបាលនៅក្នុងគម្រោងហេដ្ឋារចនាសម្ព័ន្ធដ៏ធំមួយ ប៉ុន្តែបញ្ហានេះបានក្លាយជានិមិត្តរូបនៃការមិនសប្បាយចិត្តកាន់តែខ្លាំងឡើងចំពោះនីតិរដ្ឋនៅក្នុងប្រទេសស៊ែរប៊ី៕