ត្បូងឃ្មុំ៖ តបតាមបទបញ្ជារបស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ក្នុងការរកវិធីដោះស្រាយ ដើម្បីបូមទឹកកម្ពស់ ១៦ម៉ែត្រ បញ្ជូនចូលស្រែប្រាំងរបស់បងប្អូន​ប្រជាកសិករ នៅថ្ងៃទី១ខែកុម្ភៈ ឆ្នាំ២០២៥នេះ លោក ផាង វី ប្រធាននាយកដ្ឋានធារាសាស្ត្រ​កសិកម្ម បានដឹកនាំក្រុមការងារបច្ចេកទេសក្រសួង សហការជាមួយមន្ទីរធនធានទឹក និងឧតុនិយមខេត្ត​ត្បូងឃ្មុំ អាជ្ញាធរស្រុកក្រូចឆ្មារ និងលោកមេឃុំប៉ឺស២ ចុះអន្តរាគមន៍បូមទឹក ដើម្បីបញ្ជូន​ទៅស្រោចស្រពផ្ទៃដីស្រែប្រាំងរបស់ប្រជាកសិករប្រមាណ ១៥០ហិកតា ដែលជួបការខ្វះខាតទឹក ក្នុងឃុំប៉ឺស២ ស្រុកក្រូចឆ្មារ ខេត្តត្បូងឃ្មុំ។

លោក ផាង វី បានលើកឡើងថា ទីតាំងនេះធ្លាប់ដាក់ម៉ាស៊ីនបូមទឹកចល័តកម្លាំង ៦៥សេះ ប៉ុន្តែបូមអត់រួច ដោយសារនៅទីនេះមានកម្ពស់ខ្ពស់ប្រហែល ១៦ម៉ែត្រ ហើយទុយោតចេញប្រវែង ៣៦ម៉ែត្រ ក្នុងពេលដែលសមត្ថភាពរបស់ម៉ាស៊ីនបូមទឹកចល័តអាចបូមបានត្រឹមកម្ពស់ប្រមាណ ៧ទៅ៨ម៉ែត្រប៉ុណ្ណោះ។

ជាដំណោះស្រាយ ក្នុងប្រតិបត្តិការដើម្បីបូមទឹកជួយអន្តរាគមន៍នេះ ប្រធាននាយកដ្ឋាន​ធារាសាស្ត្រកសិកម្ម លោក ផាង វី បានបញ្ជាក់ឱ្យដឹងថា ក្រុមការងារបច្ចេកទេសបានរៀបចំម៉ាស៊ីន​បូមទឹកចល័តកម្លាំង ៦៥សេះចំនួន ២គ្រឿង តជាស៊េរី បូមបណ្តាក់គ្នាដើម្បីកាត់បន្ថយកម្ពស់​ឱ្យម៉ាស៊ីន​​មាន​សមត្ថភាពក្នុងការរុញទឹកចូលក្នុងអាងដែលមានលូបង្កប់ក្នុងដី ទំហំ ៥០០មីលីម៉ែត្រ កាត់តាមវត្តពោធិសាល ប្រវែង៧០០ម៉ែត្រ ចូលទៅប្រឡាយដីប្រវែង ១៨០០ម៉ែត្រ រួចចូលក្នុង​អូរតាសូ និងទំនប់ប៉ឺស២ ដើម្បីទៅជួយសង្រ្គោះស្រូវប្រាំងរបស់ប្រជាកសិករដែលជួបប្រទះការ​ខ្វះខាតទឹកលើផ្ទៃដីសរុបប្រមាណ ១៥០ហិកតា៕