ជំនួយការរបស់លោកប្រធានាធិបតីអ៊ុយក្រែន Volodymyr Zelenskiy បាននិយាយកាលពីថ្ងៃអាទិត្យ (០២ កុម្ភៈ) ថា ការអំពាវនាវរបស់អាមេរិក ឱ្យអ៊ុយក្រែន រៀបចំការបោះឆ្នោតមួយ បន្ទាប់ពីបានយល់ព្រមលើបទឈប់បាញ់ជាមួយរុស្ស៊ី មើលទៅដូចជា "ផែនការបរាជ័យ" ប្រសិនបើមានតែចំណុចប៉ុណ្ណឹង ដោយជំរុញទីក្រុងវ៉ាស៊ីនតោន ឱ្យប្រឹងប្រែងបន្ថែមទៀត និងត្រូវការព័ត៌មានលម្អិតលើរឿងនេះ។

លោក Keith Kellogg មន្ត្រីជាន់ខ្ពស់ទទួលបន្ទុករឿងអ៊ុយក្រែន របស់លោកប្រធានាធិបតីអាមេរិក Donald Trump បានប្រាប់សារព័ត៌មានរ៉យទ័រថា សហរដ្ឋអាមេរិក ចង់ឱ្យអ៊ុយក្រែន រៀបចំការបោះឆ្នោត ប្រសិនបើអាចគឺនៅចុងឆ្នាំនេះ ជាពិសេសក្នុងករណីដែលទីក្រុងគីវ អាចយល់ព្រមលើបទឈប់បាញ់ជាមួយរុស្ស៊ី នៅប៉ុន្មានខែខាងមុខ។

លោក Dmytro Lytvyn ទីប្រឹក្សាទំនាក់ទំនងរបស់អ៊ុយក្រែន បាននិយាយថា "យើងមិនបានឃើញបទសម្ភាសន៍ពេញលេញរបស់លោក Kellogg ទេ មានតែសម្រង់សម្តីមួយចំនួនពីការបោះឆ្នោតប៉ុណ្ណោះ ដូច្នេះពិបាកក្នុងការវាយតម្លៃជំហររបស់លោកទាំងស្រុង"។ លោកបន្ថែមថា "ប៉ុន្តែប្រសិនបើផែនការនោះគ្រាន់តែជាបទឈប់បាញ់ និងការបោះឆ្នោត នោះវាគឺជាផែនការដែលបរាជ័យ"។

ទីក្រុងគីវ បាននិយាយម្តងហើយម្តងទៀតថា ខ្លួនមិនចង់បានបទឈប់បាញ់ដោយមិនមានការធានាសន្តិសុខណាមួយ ដែលនឹងបញ្ឈប់ទីក្រុងមូស្គូ មិនឱ្យបង្កើតកងកម្លាំងរបស់ខ្លួនឡើងវិញ និងចាប់ផ្តើមការវាយលុកមួយផ្សេងទៀតនាពេលអនាគតទេ។ បច្ចុប្បន្ន ការបោះឆ្នោតត្រូវបានហាមឃាត់ក្រោមច្បាប់អាជ្ញាសឹក ដែលអ៊ុយក្រែន បានដាក់បន្ទាប់ពីប្រតិបត្តិការយោធាពិសេសរបស់រុស្ស៊ី ឆ្នាំ២០២២៕