ការតវ៉ាដ៏ធំមួយបានផ្ទុះឡើងនៅកណ្តាលទីក្រុង Los Angeles សហរដ្ឋអាមេរិកកាលពីថ្ងៃអាទិត្យចុងសប្ដាហ៍នេះ ដើម្បីឆ្លើយតបទៅនឹងការបង្រ្កាបរបស់លោកប្រធានាធិបតី Trump លើជនអន្តោប្រវេសន៍ និងការសង្កត់ធ្ងន់លើការនិរទេស។

ការតវ៉ាដែលត្រូវបានរៀបចំនិងផ្សព្វផ្សាយនៅលើប្រព័ន្ធផ្សព្វផ្សាយសង្គម បានផ្ទុះឡើងដំបូងនៅ លើផ្លូវ Olvera ជិតទីក្រុង Los Angeles ។

គិតត្រឹមម៉ោង ១១ និង៣០នាទីព្រឹក ការតវ៉ាមានបាតុកររាប់ពាន់នាក់ និងកំពុងកើនឡើងជាលំដាប់ ដោយបានហែក្បួនទៅកាន់សាលាក្រុងក្នុងទីប្រជុំជននេះ ។

នៅប្រហែលថ្ងៃត្រង់ ក្រុមបាតុករមួយក្រុមធំបានដើរលើគន្លងខាងត្បូងនៃផ្លូវ 101 Freeway ក្នុង ទីក្រុង Los Angeles ។ ដល់ម៉ោង១២និង៣០នាទីថ្ងៃត្រង់ ពួកគេ បានបិទផ្លូវ១០១ទាំងសងខាងក្នុងតំបន់ដដែល ។

យោងតាមស្នងការនគរបាលក្រុងនេះ បានឱ្យដឹងថា ការតវ៉ាទាំងនោះ បានឈានដល់ការបិទផ្លូវ ទាំងសងខាងនៃផ្លូវ១០១ ក៏ដូចជាផ្លូវសំខាន់ៗផ្សេងទៀតក្នុងទីក្រុង Los Angeles ៕