រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz កាលពីថ្ងៃអាទិត្យ ទី២ ខែកុម្ភៈ បានចុះពិនិត្យប៉ុស្តិ៍យោធានៅក្នុងប្រទេសលីបង់ និងបានគំរាមក្រុមហេសបូឡា កុំឱ្យបង្ហោះយានយានដ្រូន (UAVs) ចូលទៅក្នុងប្រទេសអ៊ីស្រាអែល។

ការបាញ់ផ្លោងឆ្លងព្រំដែន រវាងអ៊ីស្រាអែល និងក្រុមហេសបូឡាគាំទ្រដោយអ៊ីរ៉ង់នៅប្រទេសលីបង់ ភាគច្រើនត្រូវបានបញ្ឈប់នៅចុងខែវិច្ឆិកា ឆ្នាំ២០២៤ នៅពេលដែលកិច្ចព្រមព្រៀងបទឈប់បាញ់ បានចូលជាធរមាន ដោយបញ្ចប់ការប្រយុទ្ធគ្នារយៈពេលជាងមួយឆ្នាំ រវាងសត្រូវប្រដាប់អាវុធទាំងពីរ។

កិច្ចព្រមព្រៀងនេះ បានអំពាវនាវឱ្យមានការរំសាយអាវុធនៃក្រុមប្រដាប់អាវុធទាំងអស់នៅក្នុងប្រទេសលីបង់ និងបាននិយាយថា «អាវុធដែលគ្មានការអនុញ្ញាត» និងហេដ្ឋារចនាសម្ព័ន្ធយោធាទាំងអស់ គួរតែត្រូវបានរុះរើ ដោយចាប់ផ្តើមពីភាគខាងត្បូងប្រទេសលីបង់។

ទោះជាយ៉ាងណា ក្រុមហេសបូឡា បានទទូចថា កិច្ចព្រមព្រៀងនេះ អនុវត្តទាំងស្រុងនៅលីបង់ភាគខាងត្បូង។

កិច្ចព្រមព្រៀងនេះ ក៏បានអំពាវនាវឱ្យទាហានអ៊ីស្រាអែល ចាកចេញពីភាគខាងត្បូងប្រទេសលីបង់ ក្នុងរយៈពេល៦០ ថ្ងៃ ប៉ុន្តែរអំឡុងពេលនោះ ត្រូវបានបន្ថែមពេលកាលពីសប្តាហ៍មុន ដល់ថ្ងៃទី១៨ ខែកុម្ភៈ ដើម្បីផ្តល់ពេលវេលាបន្ថែមទៀតសម្រាប់កងទ័ពអ៊ីស្រាអែលក្នុងការដកខ្លួនចេញ និងសម្រាប់កងទ័ពលីបង់ ដើម្បីដាក់ពង្រាយទៅកាន់តំបន់នោះ។

អ៊ីស្រាអែលនិយាយថា ប្រទេសលីបង់ ពុំទាន់បានអនុវត្តទាំងស្រុងនូវលក្ខខណ្ឌនៃកិច្ចព្រមព្រៀងនេះទេ ហើយជាពិសេស បានចោទប្រកាន់ក្រុមហេសបូឡា ថា បានរំលោភលើបទឈប់បាញ់។