រដ្ឋមន្ត្រីការបរទេសសហរដ្ឋអាមេរិកលោកម៉ាកូ រ៉ូប៊ីយ៉ូ (Marco Rubio)កាលពីថ្ងៃអាទិត្យ២កុម្ភៈ បានព្រមានប្រធានាធិបតីប៉ាណាម៉ា លោក Jose Raul Mulino ថាទីក្រុងវ៉ាស៊ីនតោននឹង "ចាត់វិធានការចាំបាច់" ប្រសិនបើប៉ាណាម៉ាមិនចាត់វិធានការភ្លាមៗដើម្បីបញ្ចប់អ្វីដែលលោកប្រធានាធិបតី Donald Trump មើលឃើញថាជាឥទ្ធិពល និងការគ្រប់គ្រងរបស់ចិនលើព្រែកជីកប៉ាណាម៉ា។

លោក Mulino បន្ទាប់ពីកិច្ចពិភាក្សាជាមួយអ្នកការទូតជាន់ខ្ពស់របស់អាមេរិករូបនេះនៅទីក្រុងប៉ាណាម៉ា បានផ្តល់សញ្ញាថាលោកនឹងពិនិត្យឡើងវិញនូវកិច្ចព្រមព្រៀងដែលពាក់ព័ន្ធនឹងប្រទេសចិន និងធុរកិច្ចចិន ហើយបានប្រកាសកិច្ចសហប្រតិបត្តិការបន្ថែមទៀតជាមួយសហរដ្ឋអាមេរិកលើការធ្វើអន្តោប្រវេសន៍ ប៉ុន្តែបានរំលឹកឡើងវិញថា អធិបតេយ្យភាពរបស់ប្រទេសលោកចំពោះផ្លូវទឹកដ៏មមាញឹកបំផុតទីពីររបស់ពិភពលោកមួយនេះ គឺមិនទាន់មានការពិភាក្សានៅឡើយទេ។ 

អ្នកនាំពាក្យក្រសួងការបរទេសអាមេរិក លោក Tammy Bruce បាននិយាយនៅក្នុងសេចក្តីថ្លែងការណ៍មួយថា លោក រ៉ូប៊ីយ៉ូ ទទួលបានសារពីលោក Trump ថាវត្តមានរបស់ប្រទេសចិន តាមរយៈក្រុមហ៊ុនមានមូលដ្ឋាននៅទីក្រុងហុងកុង ដែលប្រតិបត្តិការកំពង់ផែចំនួនពីរនៅជិតច្រកចូលព្រែកជីក គឺជាការគំរាមកំហែងដល់ផ្លូវទឹក និងការរំលោភលើសន្ធិសញ្ញាអាមេរិក-ប៉ាណាម៉ា។

លោក Bruce បាននិយាយថា ប្រមុខការទូតអាមេរិក បានបញ្ជាក់យ៉ាងច្បាស់ថាស្ថានភាពជាក់ស្ដែងនេះគឺមិនអាចទទួលយកបាន ហើយថាអវត្តមាននៃការផ្លាស់ប្តូរភ្លាមៗ នឹងតម្រូវឱ្យសហរដ្ឋអាមេរិកចាត់វិធានការចាំបាច់ដើម្បីការពារសិទ្ធិរបស់ខ្លួនក្រោមសន្ធិសញ្ញានេះ៕