សារព័ត៌មានក្នុងស្រុករាយការណ៍ថា តារាសម្ដែងស្រីជនជាតិតៃវ៉ាន់ ឈ្មោះ Barbie Hsu ដែលធ្លាប់សម្ដែងជាតួស្រី ឈ្មោះ សាន់ឆាយ ក្នុងរឿង F4 បានទទួលមរណភាពនៅថ្ងៃចន្ទ ០៣ កុម្ភៈ នេះដោយសារជំងឺរលាកផ្លូវដង្ហើម បន្ទាប់ពីកើតជំងឺផ្តាសាយធំ ខណៈកំពុងកម្សាន្តលំហែកាយនៅប្រទេសជប៉ុន ក្នុងវ័យ ៤៨ឆ្នាំ។

អ្នកនាង Hsu បានទទួលកេរ្តិ៍ឈ្មោះយ៉ាងល្បីល្បាញនៅក្នុងពិភពអ្នកនិយាយភាសាចិនកុកងឺ ហើយត្រូវបានគេស្គាល់ថាជាអ្នកសម្ដែងល្អបំផុតនៅក្នុងរឿងភាគទូរទស្សន៍ Meteor Garden ឬហៅខ្លីថារឿង F4 កាលឆ្នាំ២០០១។ រឿងភាគ Meteor Garden ត្រូវបានបកប្រែថាជាភាសាជាច្រើន ហើយបានធ្វើឱ្យអ្នកនាង Hsu ក្លាយជាតារាដ៏ល្បីមួយរូបនៅហ្វីលីពីន ឥណ្ឌូនេស៊ី និងថៃ។

ប្អូនស្រីរបស់នាងឈ្មោះ Dee Hsu បានបញ្ជាក់ពីការស្លាប់នោះទៅកាន់សារព័ត៌មាន TVBS News របស់កោះតៃវ៉ាន់ នៅថ្ងៃចន្ទ ០៣ កុម្ភៈ នេះ។ ការបញ្ជាក់អំពីការស្លាប់របស់នាងបានធ្វើឱ្យមានការភ្ញាក់ផ្អើលក្នុងចំណោមអ្នកគាំទ្រ ហើយបានបង្កឱ្យមានការអាណិតអាសូរ និងការរំលែកទុក្ខនៅលើប្រព័ន្ធផ្សព្វផ្សាយសង្គមជាច្រើន។

រឿងភាគ Meteor Garden អ្នកនាង Hsu បានសម្ដែងជាតួស្រីឈ្មោះ សាន់ឆាយ ជាសិស្សក្រីក្រមកពីគ្រួសារវណ្ណៈកណ្តាលដែលចូលរៀននៅសាលាឯកជនដ៏ល្បី ហើយជាប់ពាក់ព័ន្ធក្នុងស្នេហាដ៏ជំពាក់ជំពិនក្នុងចំណោមអ្នកស្នងមរតកត្រកូលអ្នកមាន ដែលសម្តែងដោយសមាជិកក្រុម F4 របស់កោះតៃវ៉ាន់៕