ប្រភពចំនួនបីបាននិយាយកាលពីថ្ងៃអាទិត្យ (០២ កុម្ភៈ) ថា រដ្ឋបាលរបស់លោក Donald Trump បានដកមន្ត្រីសន្តិសុខជាន់ខ្ពស់ពីរនាក់ពីតំណែងនៅអង្គការជំនួយ USAID ក្នុងអំឡុងពេលចុងសប្តាហ៍ បន្ទាប់ពីពួកគេបានព្យាយាមបញ្ឈប់អ្នកតំណាងមកពីក្រសួងប្រសិទ្ធភាពរដ្ឋាភិបាល (DOGE) របស់មហាសេដ្ឋី Elon Musk មិនឱ្យចូលទៅកាន់ផ្នែករឹតបន្តឹងនៃអគារទីភ្នាក់ងារជំនួយ។

សកម្មភាពនេះបានបន្ថែមទៅលើបុគ្គលិករាប់សិបនាក់របស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ ឬហៅថា USAID ដែលត្រូវបានដកចេញពីមុខតំណែងរបស់ពួកគេ ខណៈក្រុមរបស់លោកប្រធានាធិបតី Trump បានចាត់វិធានការលុបបំបាត់ឯករាជ្យភាពរបស់ទីភ្នាក់ងារនេះ ហើយអាចនាំអង្គការឱ្យស្ថិតនៅក្រោមការគ្រប់គ្រងរបស់ក្រសួងការបរទេស។

ប្រភពលើកឡើងថា បុគ្គលិកអាជីពជិត ៣០នាក់នៅក្នុងការិយាល័យនីតិប្បញ្ញត្តិ និងកិច្ចការសាធារណៈរបស់ទីភ្នាក់ងារនេះបានបាត់បង់ការចូលប្រើអ៊ីមែលរបស់ពួកគេក្នុងពេលមួយយប់ ដែលនាំឱ្យចំនួនបុគ្គលិកអាជីពជាន់ខ្ពស់របស់ USAID ដែលត្រូវបញ្ឈប់កាលពីសប្តាហ៍មុន ឡើងជិតដល់ ១០០នាក់។

លោក Trump កាលពីថ្ងៃអាទិត្យបាននិយាយថា ទីភ្នាក់ងារនេះ "ត្រូវបានគ្រប់គ្រងដោយក្រុមមនុស្សឆ្កួតលីលា ហើយកំពុងតែរុះរើអ្នកទាំងនោះចេញ"៕