​បាល់ទាត់៖ ​ទីបំផុត​មិន​ខុស​ពី​ពាក្យ​ចចាមអារ៉ាម​មែន​អតីត​វីរ​បុរស​របស់​ហង្ស​ក្រហម Liverpool លោក Steven Gerrard ត្រូវ​បាន​តែង​តាំងជា​អ្នកចាត់ការ​ផ្លូវការ​របស់​ក្លិប​បាល់ទាត់ Aston Villa​។ ​អតីត​ប្រធាន​ក្រុម Liverpool វ័យ ៤១ឆ្នាំ​រូបនេះ​បាន​ចុះហត្ថលេខា​ដឹកនាំ​ក្រុម​នៅ Villa Park រយៈពេល ៣ឆ្នាំកន្លះ និង​បានបញ្ចប់​អាជីព​ដឹកនាំ​របស់ខ្លួន​នៅ​ទឹកដី​ស្កុ​ត​ឡេ​ន​ជាមួយ Glasgow Rangers រយៈពេល ៣ឆ្នាំ​កន្លង​ទៅ​។

​​Steven Gerrard បានមក​កាន់ការ​នៅ Aston Villa នេះ​ជំនួស​លោក Dean Smith ដែល​ត្រូវបាន​បណ្តេញ​ចេញពីតំណែង​កាលពី​ថ្ងៃអាទិត្យ ​ក្រោយ​ដឹកនាំ​ក្រុម​ចាញ់ ៥ប្រកួត​ជាប់​គ្នា​។ ​​Aston Villa បច្ចុប្បន្នកំពុង​ឈរ​លេខ ១៦ ក្នុង​តារាង English Premier League ក្រោយ​លេង​បាន ១១ប្រកួត និង​នៅ​ពីលើ​តំបន់​កាត់ចោល​តែ ២ពិន្ទុ​ប៉ុណ្ណោះ​។ ​​Steven Gerrard បាន​និយាយថា Aston Villa គឺជា​ក្លិប​ដែលមាន​ប្រវត្តិសាស្ត្រ​អស្ចារ្យ​មួយ ហើយ​គេ​ពិតជា​មាន​មោទនភាព​នៅពេល​ទទួលបាន​សេចក្តីទុកចិត្ត​ពេលនេះ​។ ​​Steven Gerrard បានចាប់ផ្តើម​អាជីព​ជា​អ្នកចាត់ការ​ដំបូង​របស់ខ្លួន​នៅ​ឆ្នាំ២០១៨ ដឹកនាំ​ក្រុម Rangers ហើយក៏​បាន​ជួយ​ក្រុម​ឈ្នះ​ជើងឯក​លី​គ​កំពូល​ស្កុ​ត​ឡេ​ន Scottish Premiership នៅ​រដូវ​កាល ២០២០-២០២១ កន្លងទៅ​។

​​Rangers ក្រោម​ការដឹកនាំ​របស់ Gerrard ក៏​កំពុង​នាំមុខ Celtic ៤ពិន្ទុ​ដែរ​រដូវ​កាល​នេះ​។ ​​Steven Gerrard នៅពេល​ជា​កីឡាករ​បានបង្ហាញ​ខ្លួន​សរុប ៧១០ប្រកួត​ឱ្យ Liverpool ឈ្នះ​ពាន​សរុប​ចំនួន ៩ មុនពេល​ចំណាយពេល​នៅ​ទឹកដី​អាមេរិក​ ១ឆ្នាំ​លេង​ជាមួយ LA Galaxy ហើយ​ក៏​ប្រកាស​ចូលនិវត្តន៍​នៅ​ឆ្នាំ២០១៦​។ ​Steven Gerrard គឺជា​កីឡាករ​អង់គ្លេស​ទី៤ ដែល​បង្ហាញខ្លួន​បាន​ច្រើន​បំផុត​ឱ្យ​ក្រុម​ជំរើសជាតិ​សរុប ១១៤ប្រកួត​រកបាន ២១គ្រាប់​៕

​អត្ថបទ​៖​នាង សុភា​វុ​ធ