ក្រុមហាម៉ាស បានប្រកាសតំបន់ហ្កាហ្សាស្ទ្រីបថា ជា«តំបន់គ្រោះមហន្តរាយ» កាលពីថ្ងៃអាទិត្យ ដោយព្រមានពីគ្រោះមហន្តរាយមិនធ្លាប់មានពីមុនមក ដែលគំរាមកំហែងដល់អាយុជីវិតមនុស្សជាង ២.៤លាននាក់ ខណៈដែលការបំផ្លិចបំផ្លាញរីករាលដាល នៅតែបន្ត ហើយធនធានសំខាន់ៗ បានអស់ហើយ។

នៅក្នុងសេចក្តីថ្លែងការណ៍មួយ ការិយាល័យប្រព័ន្ធផ្សព្វផ្សាយដែលគ្រប់គ្រងដោយក្រុមហាម៉ាស បាននិយាយថា មនុស្សជាង ៦១.៧០៩នាក់ នៅតំបន់ហ្កាហ្សា ត្រូវបានសម្លាប់ ក្នុងនោះ ៤៧.៤៨៧នាក់ ត្រូវបានអះអាងថា បានស្លាប់ នៅក្នុងមន្ទីរពេទ្យ ខណៈដែល ១៤.២២២នាក់ នៅតែបាត់ខ្លួន នៅក្រោមគំនរបាក់បែក។ ការិយាល័យនេះ បានបន្ថែមថា ចំនួនអ្នករងរបួស បានកើនឡើងដល់ ១១១.៥៨៨នាក់។

សង្គ្រាម ក៏បានជម្លៀសប្រជាជនប៉ាឡេស្ទីនជាង ២លាននាក់ ដោយភាគច្រើនត្រូវបង្ខំឲ្យភៀសខ្លួនជាច្រើនដង។

ការិយាល័យដដែល បានរាយការណ៍ថា ផ្ទះចំនួន ៤៥០.000 ខ្នង ត្រូវបានខូចខាតក្នុងសង្គ្រាម រួមទាំង ១៧0.000 ខ្នង ត្រូវបានបំផ្លាញទាំងស្រុង។ សង្គ្រាមដ៏ឃោរឃៅនេះ ក៏បានបំផ្លាញប្រព័ន្ធថែទាំសុខភាពផងដែរ ដោយបង្ខំឲ្យមន្ទីរពេទ្យចំនួន ៣៤ និងមណ្ឌលថែទាំសុខភាពចំនួន ៨០ លែងមានដំណើរការ។

សេចក្តីថ្លែងការណ៍បានប៉ាន់ប្រមាណការខាតបង់សេដ្ឋកិច្ចជាង ៥០ ពាន់លានដុល្លារអាមេរិក ដោយបានលើកឡើងពីការបំផ្លិចបំផ្លាញនៃវិស័យឧស្សាហកម្ម ពាណិជ្ជកម្ម កសិកម្ម ការថែទាំសុខភាព ការអប់រំ និងផ្នែកទំនាក់ទំនង។