គេហទំព័រព័ត៌មាន Garowe របស់ប្រទេសនេះ បានសរសេរដោយយោងទៅអាជ្ញាធរក្នុងរដ្ឋ Puntland នៃប្រទេសសូម៉ាលីថា យ៉ាងហោចណាស់មានជនសកម្មប្រយុទ្ធចំនួន ៤៨នាក់ ត្រូវបានសម្លាប់ ដោយសារការវាយប្រហាររបស់សហរដ្ឋអាមេរិក ទៅលើទីតាំងដែលកាន់កាប់ដោយក្រុមភេរវកររដ្ឋស្លាម។ 

យោងតាមព័ត៌មានរបស់គេហទំព័រនេះ ចំនួនអ្នកស្លាប់រួមមាន មេបញ្ជាការប្រចាំតំបន់ចំនួន ៥នាក់ និងជនសកម្មប្រយុទ្ធបរទេស ១២នាក់ ។ប្រធានាធិបតីអាមេរិក លោក ដូណាល់ ត្រាំ បានសរសេរនៅលើគេហទំព័រ Truth Social ថា លោកបានបញ្ជាឲ្យយោធាអាមេរិក ធ្វើការវាយលុកយ៉ាងជាក់លាក់ ទៅលើកន្លែងលាក់ខ្លួន ដែលគេសន្មតថា ជាមេបញ្ជាការជាន់ខ្ពស់ IS និងភេរវករផ្សេងទៀត។ ការវាយប្រហារនោះ បានកំណត់គោលដៅរូងភ្នំ ជាកន្លែងដែលក្រុមសកម្មប្រយុទ្ធរដ្ឋឥស្លាមសន្មតថា ជាទីជម្រករបស់ខ្លួន។ រដ្ឋមន្ត្រីការពារជាតិអាមេរិក លោក Pete Hegseth បាននិយាយថា ក្រុមភេរវករ បានបន្តការខាតបង់យ៉ាងធ្ងន់ធ្ងរ ដោយសារការវាយប្រហាររបស់សហរដ្ឋអាមេរិក។ សារព័ត៌មាន ABC News បានរាយការណ៍ថា ការវាយប្រហារតាមផ្លូវអាកាស ធ្វើឡើងដោយយន្តហោះចម្បាំងពីនាវាផ្ទុកយន្តហោះ USS Harry S. Truman នៅសមុទ្រក្រហម។ រដ្ឋាភិបាលសូម៉ាលី ត្រូវបានជូនដំណឹងអំពីប្រតិបត្តិការនេះ។