ប្រធានសិទ្ធិមនុស្សរបស់អង្គការសហប្រជាជាតិ បាននិយាយកាលពីថ្ងៃសុក្រថា លោកមានការព្រួយបារម្ភ យ៉ាងខ្លាំង ចំពោះរបាយការណ៍នៃការកាត់ទោសប្រហារជីវិតជនស៊ីវិល នៅទីក្រុងខាទុំ( Khartoum) ខាងជើងដែលត្រូវបានចោទប្រកាន់ដោយក្រុមយុទ្ធជនកងទ័ពស៊ូដង់ និងកងជីវពលសម្ព័ន្ធមិត្ត។

លោក Volker Turk បាននិយាយនៅក្នុងសេចក្តីថ្លែងការណ៍មួយថា៖«ការសម្លាប់ដោយចេតនានូវជនស៊ីវិល ឬនរណាម្នាក់ដែលមិនបានចូលរួមដោយផ្ទាល់នៅក្នុងអរិភាព គឺជាឧក្រិដ្ឋកម្មសង្គ្រាម»។

យោងតាមអង្គការសហប្រជាជាតិបានឲ្យដឹងថា សង្រ្គាមរវាងកងទ័ពស៊ូដង់ (SAF) និងកងកម្លាំងយោធាប៉ារ៉ាគាំទ្ររហ័ស (RSF) ចាប់តាំងពីខែមេសា ឆ្នាំ ២០២៣ បានសម្លាប់មនុស្សរាប់ម៉ឺននាក់ និងបានធ្វើឲ្យ មនុស្សជាង ១២លាននាក់ ផ្លាស់ទីលំនៅ ហើយបានរុញច្រានរាប់លាននាក់ ធ្លាក់ក្នុងស្ថានភាពនៃគ្រោះទុរ្ភិក្ស។

បន្ទាប់ពីមានភាពជាប់គាំងជាច្រើនខែ នៅក្នុងទីក្រុងខាទុំ ( Khartoum) កងទ័ពកាលពីសប្តាហ៍មុន បានបំបែកការឡោមព័ទ្ធរបស់កងកម្លាំង RSF ជិតពីរឆ្នាំនៃទីស្នាក់ការបញ្ជាការទូទៅនៅទិក្រុងខាទុំរបស់ខ្លួន។

នៅថ្ងៃដដែលនោះ កងទ័ពបានរាយការណ៍ថា បានដណ្តើមយកមកវិញនូវមូលដ្ឋាន Signal Corps របស់ខ្លួន នៅទីក្រុងខាទុំខាងជើង North និងបានបណ្តេញកងកម្លាំង RSF ចេញពីរោងចក្រចម្រាញ់ប្រេង Jaili នៅភាគខាងជើងនៃទីក្រុងខាទុំ។