លោកប្រធានាធិបតីអាមេរិក Donald Trump បាននិយាយថា លោកនឹងពិភាក្សាអំពីការដំឡើងពន្ធ ដែលលោកបានដាក់លើប្រទេសកាណាដា និងម៉ិកស៊ិក ជាមួយប្រទេសទាំង២ នៅថ្ងៃចន្ទ (ទី៣ ខែកុម្ភៈ) នេះ បន្ទាប់ពីបានលើកឡើងថា ជនជាតិអាមេរិកអាចរងផលប៉ះពាល់ខាងសេដ្ឋកិច្ចពីកម្រិតពន្ធ ២៥ភាគរយនេះ ប៉ុន្តែថា វានឹង «ទទួលបានផលវិជ្ជមានយ៉ាងស័ក្ដិសម»។

ក្រោយចំណាយពេលចុងសប្តាហ៍ នៅរដ្ឋ Florida អំឡុងពេលថ្លែងទៅកាន់អ្នកសារព័ត៌មាន បន្ទាប់ពីលោកបានត្រលប់ទៅទីកាន់ក្រុងវ៉ាស៊ីនតោនវិញ កាលពីល្ងាចថ្ងៃអាទិត្យ (ទី២ ខែកុម្ភៈ) លោក Trump បានប្រាប់ថា៖ «ខ្ញុំនឹងនិយាយជាមួយនាយករដ្ឋមន្ត្រី លោក Justin Trudeau នៅព្រឹកថ្ងៃស្អែក ហើយខ្ញុំក៏នឹងនិយាយជាមួយម៉ិកស៊ិក នៅព្រឹកថ្ងៃស្អែកដូចគ្នាដែរ»។ លោកបានបន្ថែមថា៖ «ខ្ញុំមិនរំពឹងថា នឹងមានអ្វីគួរឲ្យភ្ញាក់ផ្អើលនោះទេ»។

គួរបញ្ជាក់ថា ជាមួយគ្នានេះ លោក Trump ក៏បានដំឡើងពន្ធផងដែរលើប្រទេសចិន ១០ភាគរយបន្ថែមពីលើពន្ធមានរួចហើយ។ ក្នុងនាមជាអ្នកគាំទ្រនយោបាយដំឡើងពន្ធយ៉ាងខ្លាំងក្លា លោក Trump តែងតែអះអាងថា ផលប៉ះពាល់ពីការកអនុវត្តនេះ នឹងធ្លាក់ទៅអ្នកនាំចេញបរទេស ដោយមិនមែនអ្នកប្រើប្រាស់អាមេរិកនោះទេ ដែលការលើកឡើងនេះផ្ទុយស្រឡះពីទស្សនៈរបស់អ្នកជំនាញពីគ្រប់មជ្ឈដ្ឋាន។

ចិន ម៉ិកស៊ិក និងកាណាដា គឺជាដៃគូពាណិជ្ជកម្មធំៗជាងគេទាំង៣ របស់សហរដ្ឋអាមេរិក ហើយក្រោយមានចំណាត់ការរបស់លោក Trump ប្រទេសទាំងនេះ បានប្តេជ្ញាចេញវិធានការសងសឹក នៅពេលដែលការដំឡើងពន្ធនេះចូលជាធរមាន នៅថ្ងៃទី៤ ខែកុម្ភៈ៕