រដ្ឋាភិបាលអូស្ត្រាលី បានធ្វើការលើកលែង ចំពោះបណ្ដាញសង្គម YouTube ក្នុងពេលដែលខ្លួនបានអនុម័តច្បាប់ហាមឃាត់មិនឲ្យចូលប្រើបណ្ដាញសង្គម សម្រាប់កុមារអាយុក្រោម ១៦ឆ្នាំ ប៉ុន្តែអ្នកជំនាញផ្នែកសុខភាពផ្លូវចិត្ត និងជ្រុលនិយមមួយចំនួន លើកឡើងថា គេហទំព័រចែករំលែកវីដេអូនេះ ធ្វើឲ្យកុមារៗប្រឈមហានិភ័យ ដោយសារមាតិកាដែលនាំឲ្យញៀន និងគ្រោះថ្នាក់។

ប្រទេសអូស្ត្រាលី នឹងបិទវេទិកាចែករំលែកវីដេអូ TikTok និង Snapchat បណ្ដាញសង្គម Instagram និង Facebook របស់ក្រុមហ៊ុន Meta និងបណ្ដាញសង្គម X របស់លោក Elon Musk ដើម្បីកុំឲ្យអនីតិជនចូលប្រើប្រាស់បាន នៅចុងឆ្នាំ២០២៥ ដោយបង្ខំឲ្យក្រុមហ៊ុនទាំងនោះដាក់កម្រិតអាយុយ៉ាងតឹងរ៉ឹង សម្រាប់ការចូលប្រើ ឬបើមិនដូច្នោះទេ ត្រូវប្រឈមនឹងការផាកពិន័យយ៉ាងធ្ងន់ធ្ងរ។ ក្នុងពេលជាមួយគ្នា រដ្ឋាភិបាលនឹងបន្តឲ្យ YouTube ដែលគ្រប់គ្រងដោយក្រុមហ៊ុន Alphabet អាចចូលមើលបានសម្រាប់មនុស្សគ្រប់វ័យ ព្រោះវាជាឧបករណ៍អប់រំដ៏មានតម្លៃ ហើយមិនមែនជា «កម្មវិធីបណ្ដាញសង្គមស្នូល» នោះទេ។

តែទោះជាយ៉ាងណាក្ដី អ្នកស្រាវជ្រាវផ្នែកជ្រុលនិយម និងអ្នកស្រាវជ្រាវសុខភាពផ្លូវចិត្តចំនួន ៦រូប ដែលត្រូវបានសម្ភាសដោយសារព័ត៌មាន Reuters បានលើកឡើងដូចគ្នាថា ការលើកលែងនេះធ្វើឲ្យខូចដល់គោលដៅចម្បងរបស់អូស្ត្រាលី ក្នុងការការពារអ្នកប្រើប្រាស់វ័យក្មេងពីមាតិកាដែលបង្កគ្រោះថ្នាក់។

ដោយដំណើរការការសិក្សាចំនួន ២ ដែលផ្តល់ដោយរដ្ឋាភិបាល ស្តីពីខ្លឹមសារជ្រុលនិយម នៅលើ YouTube លោកស្រី Lise Waldek សាស្ត្រាចារ្យនៅនាយកដ្ឋានសិក្សាផ្នែកសន្តិសុខ និងឧក្រិដ្ឋកម្មនៃសាកលវិទ្យាល័យ Macquarie បានប្រាប់ថា៖ «YouTube បង្កបញ្ហាយ៉ាងខ្លាំង មិនត្រឹមតែដោយសារតួនាទីរបស់វា ទាក់ទងនឹងភាពជ្រុលនិយម និងការរីករាលដាលនៃមាតិកាជ្រុលនិយម ព្រមទាំងខ្លឹមសារហិង្សា និងខ្លឹមសារអាសអាភាសប៉ុណ្ណោះទេ ប៉ុន្តែថែមទាំងដោយសារតែវាផ្តល់នូវខ្លឹមសារវីដេអូដែលងាយញៀនខ្លាំងដល់យុវវ័យផងដែរ»៕