ប្រធានាធិបតីអាមេរិក លោក Donald Trump និងនាយករដ្ឋមន្ត្រីអ៊ីស្រាអែល លោក Benjamin Netanyahu មិនពេញចិត្តគ្នា និងមិនទុកចិត្តគ្នាទៅវិញទៅមកនោះទេ ប៉ុន្តែមជ្ឈដ្ឋានផ្ទៃក្នុង និយាយថា មេដឹកនាំទាំង២ អាចលាក់អារម្មណ៍ដែលមានផ្ទាល់ខ្លួន ដើម្បីជំរុញឲ្យមានសន្តិភាព នៅមជ្ឈិមបូព៌ា។

មជ្ឈដ្ឋានទាំងនោះ បានប្រាប់ថា លោក Netanyahu នឹងជួបជាមួយលោក Trump នៅសេតវិមាន នាថ្ងៃអង្គារ (ទី៤ ខែកុម្ភះ) ហើយថា មេដឹកនាំទាំង២ នឹងពិភាក្សាអំពី «ជ័យម្នះលើក្រុមហាម៉ាស» ទប់ទល់ជាមួយអ៊ីរ៉ង់ និងការពង្រីកទំនាក់ទំនងការទូតជាមួយបណ្តាប្រទេសអារ៉ាប់។

នាយករដ្ឋមន្ត្រីអ៊ីស្រាអែល កំពុងស្ថិតក្រោមសម្ពាធខ្លាំងឡើងៗ ពីដៃគូក្រុមស្តាំនិយមជ្រុល ក្នុងរដ្ឋាភិបាល ដែលចង់ឲ្យចាប់ផ្ដើមសង្គ្រាមឡើងវិញ នៅតំបន់ហ្កាហ្សា បន្ទាប់ពីដំណាក់កាលទី១ ត្រូវបានបញ្ចប់នៅដើមខែមីនា។

លោក Netanyahu បាននិយាយថា អ៊ីស្រាអែលនៅតែប្តេជ្ញាចិត្ត ដើម្បីយកឈ្នះលើក្រុមហាម៉ាស និងនាំមកវិញនូវចំណាប់ថ្នូរទាំងអស់ដែលត្រូវបានចាប់ខ្លួន នៅក្នុងការវាយប្រហារ កាលពីថ្ងៃទី៧ ខែតុលា ឆ្នាំ២០២៣ របស់ពួកសកម្មប្រយុទ្ធ ដែលជាហេតុការណ៍បានបង្កឲ្យមានសង្រ្គាមយ៉ាងខ្លាំងក្លា នៅហ្កាហ្សា។

ប៉ុន្តែលោក Trump ចង់ឲ្យបទឈប់បាញ់ដែលបានកើតមានឡើងកាលពីខែមុន ក្លាយជាការបញ្ឈប់អំពើហិង្សារយៈពេលវែង ដែលតាមការអះអាងក៏នឹងអាចបង្កើតបានកិច្ចព្រមព្រៀងជាមួយអារ៉ាប៊ីសាអ៊ូឌីត និងអ៊ីរ៉ង់។

បណ្ដាអ្នកជំនាញ បានព្រមានថា ទោះបីជាទំនាក់ទំនងរបស់លោក Trump និងលោក Netanyahu មិនសូវជាចុះសម្រុងគ្នាក៏ដោយ ប៉ុន្តអ្នកទាំង២ អាចត្រូវបានបង្ខំធ្វើការរួមគ្នា ដើម្បីបញ្ចប់សង្រ្គាម បន្ទាប់ពីរដ្ឋបាលលោក Trump បានបង្ហាញថា ខ្លួនមិនមានឆន្ទៈទទួលយកការពន្យារពេលរបស់លោក Netanyahu នោះឡើយ៕