នាយករដ្ឋមន្ត្រីអង់គ្លេស លោក Keir Starmer ធ្វើដំណើរទៅទីក្រុងប្រ៊ុចសែល ប្រទេសបែលហ្ស៊ិក នាថ្ងៃចន្ទ (ទី៣ ខែកុម្ភៈ) នេះ ដើម្បីអំពាវនាវឲ្យអឺរ៉ុបធ្វើការបន្ថែមទៀត ប្រសិនបើចង់ការពារតំបន់នេះឲ្យមានសុវត្ថិភាពពីរុស្ស៊ី និងឲ្យមានកិច្ចប្រឹងប្រែងថ្មី ដើម្បីបំផ្លាញ «ម៉ាស៊ីនធ្វើសង្គ្រាម» របស់លោកប្រធានាធិបតី Vladimir Putin។

លោក Starmer ដែលស្ថិតនៅទីក្រុងប្រ៊ុចសែល ដើម្បីពង្រឹងទំនាក់ទំនងឡើងវិញក្រោយ Brexit (ការចាកចេញពីសហភាពអឺរ៉ុបរបស់ចក្រភពអង់គ្លេស) ជាមួយសហភាពអឺរ៉ុប (EU) នឹងជួបអគ្គលេខាធិការអង្គការណាតូ លោក Mark Rutte ហើយបន្ទាប់មកទទួលទានអាហារជាមួយបណ្ដាមេដឹកនាំមកពីរដ្ឋសមាជិកទាំង ២៧ប្រទេស ដោយនេះជាលើកដំបូងដែលមេដឹកនាំអង់គ្លេស ធ្វើដូច្នេះ ចាប់តាំងពីចក្រភពអង់គ្លេសដកខ្លួនចេញពីប្លុកនេះ។

លោកនឹងជំរុញឲ្យមេដឹកនាំបង្កើនសម្ពាធលើលោក Putin ដោយនិយាយយោងទៅដល់ការលើកឡើងរបស់ប្រធានាធិបតីអាមេរិក លោក Donald Trump ដែលថា លោកនឹងបន្ថែមពន្ធថ្មីពីលើទណ្ឌកម្មដែលមានស្រាប់ ចំពោះទីក្រុងមូស្គូ ប្រសិនបើគ្មានកិច្ចព្រមព្រៀង ដើម្បីបញ្ចប់សង្រ្គាមរបស់ប្រទេសនេះ នៅអ៊ុយក្រែនទេនោះ បានធ្វើឲ្យមេដឹកនាំរុស្ស៊ីមិនស្រណុកចិត្តឡើយ។

យោងតាមការកត់សម្គាល់ដែលត្រូវបានផ្ដល់ដោយការិយាល័យវិមាន Downing Street បានបង្ហាញថា លោក Starmer នឹងនិយាយថា៖ «យើងត្រូវការឃើញសម្ព័ន្ធមិត្តទាំងអស់បង្កើនកិច្ចប្រឹងប្រែងរបស់ខ្លួន ជាពិសេសនៅតំបន់អឺរ៉ុប។ ខ្ញុំមកទីនេះ ដើម្បីធ្វើការជាមួយដៃគូអឺរ៉ុបរបស់យើង ពាក់ព័ន្ធនឹងការបន្ថែមសម្ពាធ ការផ្តោតលើប្រាក់ចំណូលថាមពល និងក្រុមហ៊ុនដែលផ្គត់ផ្គង់រោងចក្រមីស៊ីលរបស់ប្រធានាធិបតីរុស្ស៊ី ដើម្បីបំផ្លាញម៉ាស៊ីនធ្វើសង្គ្រាមរបស់លោក Putin»៕