ការកើនឡើងនៃអំពើហិង្សាក្នុងនិងជុំវិញបន្ទាយរបស់ក្រុមប្រឆាំង នៅភាគពាយព្យប្រទេសស៊ីរី បានសម្លាប់មនុស្ស ៩៤៨នាក់ ក្នុងមួយខែ ដែលស្ទើរតែមួយភាគបីនៃពួកគេ គឺជាជនជាតិស៊ីវិល។

កិច្ចព្រមព្រៀងខែកញ្ញា ត្រូវបានគេសន្មត់ថា នឹងបញ្ចៀសការវាយលុករបស់របបពេញលេញលើខេត្ត Idlib និងតំបន់ជាប់គ្នាដែលកាន់កាប់ដោយអតីតសាខារបស់អាល់កៃដា Hayat Tahrir Al-Sham។

ប៉ុន្តែរបបនេះ និងសម្ព័ន្ធមិត្តរុស្ស៊ីរបស់ខ្លួន ចាប់តាំងពីចុងខែមេសា បានបង្កើនការវាយប្រហារតាមអាកាស និងបាញ់គ្រាប់រ៉ូកែត ទៅលើទីតាំងរឹងមាំរបស់ក្រុមប្រឆាំង ហើយក្រុមអ្នកយុទ្ធជន បានប៉ះទង្គិចគ្នា យ៉ាងខ្លាំងក្លា។

ក្រុមឃ្លាំមើលសិទ្ធិមនុស្សស៊ីរី បាននិយាយថា ចាប់តាំងពីថ្ងៃទី ៣០ ខែមេសាមក ការវាយប្រហាររបស់របបនេះ និងរុស្ស៊ី បានសម្លាប់ជនស៊ីវិល ២៨៨ នាក់ ក្នុងនោះមានកុមារ ៦៧នាក់។

ក្រុមឃ្លាំមើលដែលមានមូលដ្ឋាននៅចក្រភពអង់គ្លេស បានអះអាងថា ការបាញ់គ្រាប់រ៉ូកែតរបស់ក្រុមជីហាដ បានសម្លាប់ជនស៊ីវិល ២២នាក់បន្ថែមទៀត ក្នុងនោះមានកុមារ ១០នាក់ នៅក្នុងទឹកដីដែលគ្រប់គ្រងដោយរបបនេះ។

ទន្ទឹមនឹងនេះ វិមានក្រឹមឡាំង បាននិយាយកាលពីថ្ងៃសុក្រថា នេះគឺជាការទទួលខុសត្រូវរបស់ប្រទេសទួរគី ក្នុងការបញ្ឈប់ក្រុមឧទ្ទាម នៅក្នុងខេត្តអ៊ីដលីប ពីការបាញ់ទៅលើគោលដៅជនស៊ីវិល និងរុស្សី ដោយបានបង្ហាញថា ខ្លួននឹងបន្តគាំទ្រការវាយលុករបស់របបស៊ីរី នៅទីនោះ បើទោះបីជាមានការតវ៉ាពីទីក្រុងអង់ការ៉ាក៏ដោយ។