ប្រធានាធិបតីអាមេរិកលោក Donald Trump បានបង្គាប់បញ្ជាឲ្យដំឡើងពន្ធយ៉ាងទូលំទូឡាយលើទំនិញដែលនាំចូលពីប្រទេសម៉ិកស៊ិក កាណាដា និងចិន ដោយទាមទារឲ្យប្រទេសទាំងនោះទប់ស្កាត់លំហូរជនអន្តោប្រវេសន៍ខុសច្បាប់ និងសារធាតុហ្វង់តានីល កុំឲ្យចូលសហរដ្ឋអាមេរិក ដោយនេះជាការសម្រេចនាំឲ្យមានការចាប់ផ្តើមនូវសង្គ្រាមពាណិជ្ជកម្មដែលអាចប៉ះពាល់ដល់កំណើនសេដ្ឋពិភពលោក និងបង្កជាអតិផរណា។

នេះជាសម្រង់សម្ដីប្រតិកម្មតបខ្លះៗពីតំបន់អឺរ៉ុប ក្រោយមានការប្រកាសដំឡើងពន្ធរបស់សហរដ្ឋអាមេរិក។ នៅចក្រភពអង់គ្លេស អ្នកនាំពាក្យរដ្ឋាភិបាលអង់គ្លេស នៅថ្ងៃចន្ទ (ទី៣ ខែកុម្ភៈ) នេះ បាននិយាយថា ចក្រភពអង់គ្លេសមានទំនាក់ទំនងពាណិជ្ជកម្មដោយ «ស្មើភាព និងតុល្យភាព» ជាមួយសហរដ្ឋអាមេរិក ដែលផ្តល់ផលប្រយោជន៍ឲ្យគ្នាទៅមក។ អ្នកនាំពាក្យបានបញ្ជាក់ថា៖ «សហរដ្ឋអាមេរិក គឺជាសម្ព័ន្ធមិត្តដែលមិនអាចខ្វះបាន និងជាដៃគូពាណិជ្ជកម្មជិតស្និទ្ធបំផុតរបស់យើង»។ ចំណែកនាយករដ្ឋមន្ត្រីអង់គ្លេស លោក Keir Starmer បានប្រាប់អ្នកសារព័ត៌មានកាលពីចុងសប្តាហ៍ថា កិច្ចពិភាក្សាដំបូងរបស់លោកជាមួយលោក Trump បានផ្តោតលើការកសាងទំនាក់ទំនងពាណិជ្ជកម្មដ៏រឹងមាំ។

នៅអាល្លឺម៉ង់ មេដឹកនាំបក្សប្រឆាំងខាងក្រុមអភិរក្សនិយម និងជាអ្នកដែលត្រូវបានរំពឹងក្លាយជាអធិការបតីបន្ទាប់ គឺលោក Friedrich Merz បាននិយាយថា៖ «ឥឡូវនេះ លោក Trump ក៏នឹងត្រូវដឹងផងដែរថា ការដំឡើងពន្ធរបស់លោក នឹងមិនមានផលប៉ះពាល់ដល់អ្នកនាំចូលទៅអាមេរិកនោះទេ។ តែផ្ទុយទៅវិញ ចំណាត់ការនេះ នឹងត្រូវប៉ះពាល់ដល់អ្នកប្រើប្រាស់ នៅអាមេរិក»។ លោកបានបន្ថែមថា ពន្ធនេះក៏អាចបង្កឲ្យមានអតិផរណានៅសហរដ្ឋអាមេរិកផងដែរ។

នៅអេស្ប៉ាញ រដ្ឋមន្ត្រីសេដ្ឋកិច្ចអេស្ប៉ាញ លោក Carlos Cuerpo បាននិយាយថា សហភាពអឺរ៉ុប (EU) ត្រូវតែរួមគ្នា ដើម្បីឆ្លើយតបទៅនឹងការគំរាមកំហែងរបស់លោក Trump ក្នុងការយកពន្ធលើផលិតផលរបស់ខ្លួន។ លោក Cuerpo បានប្រាប់ស្ថានីយវិទ្យុអេស្ប៉ាញ RNE ថា ប្លុកនេះគួរតែការពារក្រុមហ៊ុនរបស់ខ្លួន និងធ្វើឲ្យប្រាកដថា ពួកគេស្ថិតក្នុងស្ថានភាពប្រកួតប្រជែង ដែលមានលក្ខខណ្ឌស្មើភាពគ្នាជាមួយគូប្រជែងមកពីប្រទេសផ្សេងៗ។

នៅបារាំង ទេសាភិបាលធនាគារកណ្តាលបារាំង លោក Francois Villeroy de Galhau បានប្រាប់សារព័ត៌មាន France Info ដោយលោកបានបន្ថែមថា ការដំឡើងពន្ធគយពាណិជ្ជកម្មរបស់លោក Trump «នឹងបង្កើនឲ្យភាពមិនច្បាស់លាស់ខាងសេដ្ឋកិច្ចខ្លាំងឡើងៗ។ លោក Villeroy ដែលជាអ្នកបង្កើតគោលនយោបាយរបស់ធនាគារកណ្តាលអឺរ៉ុបផងដែរនោះ បាននិយាយថា ការដំឡើងពន្ធរបស់លោក Trump គឺ «គ្មានការយោគយល់ទាល់តែសោះ» ហើយនឹងប៉ះពាល់ដល់វិស័យរថយន្តជាពិសេស៕