តេក្វាន់ដូ៖ ខេមរសហព័ន្ធតេក្វាន់ដូ WT បានប្រកាសរៀបចំការប្រកួតជ្រើសរើសជើងឯកថ្នាក់ជាតិប្រចាំឆ្នាំ២០២១ ចាប់ពីថ្ងៃទី១៦ ដល់ថ្ងៃទី១៩ ខែធ្នូខាងមុខនៅរាជធានីភ្នំពេញ បន្ទាប់ពីប្រមុខរាជរដ្ឋាភិបាលសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសបើកដំណើរការប្រទេសលើគ្រប់វិស័យឡើងវិញកាលពីថ្មីៗ។
សហព័ន្ធបានជូនដំណឹងដល់បណ្ដាក្លិបសមាជិកពេញសិទ្ធទូទាំងរាជធានី-ខេត្តក្នុងការត្រៀមខ្លួនចូលរួម ដ្បិតការទទួលពាក្យចូលរួមប្រកួតកីឡាតេក្វាន់ដូ WT ជើងឯកថ្នាក់ជាតិឆ្នាំ២០២១ នេះគ្រោងនឹងបញ្ចប់នាថ្ងៃទី១២ ខែធ្នូខាងមុខ។ ចំពោះអ្នកចូលរួមទាំងអស់ត្រូវគោរពវិធានការសុខាភិបាល ពិសេសត្រូវមានកាតចាក់វ៉ាក់សាំងមូលដ្ឋានឡើងទៅ។ លោក ជ្រិន សុធា អគ្គលេខាធិការខេមរសហព័ន្ធតេក្វាន់ដូ WT បានបញ្ជាក់ថា ការប្រកួតជ្រើសរើសជើងឯងកីឡាតេក្វាន់ដូ WT ថ្នាក់ជាតិឆ្នាំ២០២១ នេះ សហព័ន្ធបានសម្រេចដាក់វិញ្ញាសាចំនួន ១៧ ក្នុងនោះមានវិញ្ញាសាប្រយុទ្ធ ១០ប្រភេទទម្ងន់ និងវិញ្ញាសាសម្ដែងមេគុនចំនួន ៧ ខណៈកីឡាករ-កីឡាការិនីចូលរួមត្រូវបានកំណត់ចន្លោះអាយុពី ១២ ទៅ ១៨ឆ្នាំប៉ុណ្ណោះ។
ថ្នាក់ដឹកនាំសហព័ន្ធរំពឹងថា បណ្ដាក្លិបសមាជិកនឹងបញ្ជូនកីឡាករ-កីឡាការិនីចូលរួមប្រកួតប្រជែងច្រើន ដើម្បីជាការវាស់ស្ទង់សមត្ថភាព និងដុះខាត់បច្ចេកទេសឲ្យកាន់តែប្រសើរ ពិសេសគឺដើម្បីចម្រាញ់រកធនធានកីឡាករ-កីឡាការិនីឆ្នើមសម្រាប់បន្ដវេន និងត្រៀមដំណើរឆ្ពោះទៅការប្រកួតកីឡាស៊ីហ្គេមលើកទី៣២ នាឆ្នាំ២០២៣ នៅប្រទេសកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
