ប្រភពពីរុស្ស៊ីចំនួន ២នាក់ ដែលដឹងអំពីការពិភាក្សា បានប្រាប់សារព័ត៌មាន Reuters ថា ប្រទេសអារ៉ាប៊ីសាអ៊ូឌីត និងអារ៉ាប់រួម ត្រូវបានរុស្ស៊ីមើលឃើញថា អាចជាកន្លែង សម្រាប់ជំនួបកំពូល រវាងប្រធានាធិបតីអាមេរិក លោក Donald Trump និងប្រធានាធិបតីរុស្ស៊ី លោក Vladimir Putin។

លោក Trump បាននិយាយថា លោកនឹងបញ្ចប់សង្គ្រាមនៅអ៊ុយក្រែនឲ្យបានឆាប់តាមដែលអាចធ្វើទៅបាន ហើយបានបញ្ជាក់ថា លោកត្រៀមខ្លួនជាស្រេច ដើម្បីជួបជាមួយលោក Putin។ ចំណែកលោក Putin បានអបអរសាទរលោក Trump ចំពោះជ័យជម្នះ ក្នុងការបោះឆ្នោត ហើយបានប្រាប់ថា លោកត្រៀមខ្លួនជាស្រេច ដើម្បីជួបលោក Trump សម្រាប់កិច្ចពិភាក្សា អំពីអ៊ុយក្រែន និងថាមពល។

មន្ត្រីរុស្ស៊ី បានបដិសេធម្តងហើយម្តងទៀតរាល់ការទាក់ទងដោយផ្ទាល់ជាមួយសហរដ្ឋអាមេរិក ពាក់ព័ន្ធនឹងការរៀបចំ ដើម្បីឲ្យមានការជជែកតាមទូរសព្ទ រវាងលោក Trump និងលោក Putin ដែលនៅទីបំផុត នឹងនាំទៅដល់កិច្ចប្រជុំ នៅដំណាច់ឆ្នាំ២០២៥។

តែទោះជាយ៉ាងណាក្ដី មន្ត្រីជាន់ខ្ពស់រុស្ស៊ី បានទៅទស្សនកិច្ចទាំងអារ៉ាប៊ីសាអ៊ូឌីត និងអារ៉ាប់រួម ក្នុងប៉ុន្មានសប្តាហ៍ថ្មីៗនេះ។ នេះបើយោងតាមប្រភពរុស្ស៊ីដែលបាននិយាយក្នុងលក្ខខណ្ឌមិនបញ្ចេញឈ្មោះដោយសារតែភាពរសើបនៃស្ថានការណ៍នេះ។

ប្រភពមួយបានប្រាប់ថា នៅតែមានការប្រឆាំងខ្លះ ចំពោះគំនិតនេះ នៅក្នុងប្រទេសរុស្ស៊ី ខណៈដែលអ្នកការទូត និងមន្ត្រីចារកម្មមួយចំនួន កំពុងលើកឡើងពីទំនាក់ទំនងយោធា និងសន្តិសុខដ៏ជិតស្និទ្ធដែលអារ៉ាប់ប៊ីសាអ៊ូឌីត និងអារ៉ាប់រួម មានជាមួយសហរដ្ឋអាមេរិក។

ទាំងអារ៉ាប៊ីសាអ៊ូឌីត និងអារ៉ាប់រួម មិនបានឆ្លើយតបនឹងសំណើសុំការអត្ថាធិប្បាយនោះឡើយ។ ចំណែកវិមានក្រឹមឡាំង បានបដិសេធមិនធ្វើអត្ថាធិប្បាយអ្វីទាំងអស់៕