នាយករដ្ឋមន្ត្រីប៉ូឡូញ លោក Donald Tusk នៅថ្ងៃចន្ទ (ទី៣ ខែកុម្ភៈ) បាននិយាយថា រាល់ការប៉ុនប៉ងណាមួយ ដើម្បីបង្កើតសង្រ្គាមពាណិជ្ជកម្ម គឺជាកំហុសទាំងស្រុង ដោយការលើកឡើងនេះ កើតបន្ទាប់ពីប្រធានាធិបតីអាមេរិក លោក Donald Trump បាននិយាយកាលពីចុងសប្តាហ៍ថា លោកនឹងដំឡើងពន្ធយ៉ាងខ្ពស់លើទំនិញនាំចូលពីប្រទេសម៉ិកស៊ិក កាណាដា និងចិន។

លោក Tusk បានប្រាប់អ្នកសារព័ត៌មានថា៖ «ប្រទេសប៉ូឡូញប្រាកដណាស់ នឹងជាប្រទេសដែលជួយជំរុញដល់ការមានសុភនិច្ឆ័យ និងការប្រុងប្រយ័ត្ន។ ប៉ុន្តែយើងក៏ត្រូវនិយាយយ៉ាងច្បាស់ដែរថា ផែនការណាមួយ ដើម្បីដាក់ចេញនូវការដំឡលងពន្ធគយ និង (បង្ក) សង្គ្រាមពាណិជ្ជកម្ម គឺជាកំហុសទាំងស្រុង» ។ 

លោកបានបន្ថែមថា៖ «ខ្ញុំសង្ឃឹមថា ជំហរអឺរ៉ុបដ៏រឹងមាំ ច្បាស់លាស់ អំណោយផល ប៉ុន្តែតឹងតែងបែបនេះ នឹងធ្វើរដ្ឋបាលអាមេរិកយសល់ច្បាស់ជាមិនខាន»។

គួរបញ្ជាក់ថា បណ្ដាមេដឹកនាំនៃប្រទេសសមជិកសហភាពអឺរ៉ុប កំពុងជួបប្រជុំគ្នានៅថ្ងៃចន្ទនេះ ដោយត្រៀមទប់ទល់នឹងលទ្ធភាព ដែលថា ពួកគេក៏នឹងត្រូវប្រឈមជាមួយនឹងការដំឡើងពន្ធពាណិជ្ជកម្មរបស់សហរដ្ឋអាមេរិកផងដែរ។

មុនពេលចាកចេញទៅចូលរួមកិច្ចប្រជុំ នៅទីក្រុងប្រ៊ុចសែល ប្រទេសបែលហ្ស៊ិក លោក Tusk បានប្រាប់អ្នកសារព័ត៌មានថា៖ «យើងត្រូវតែរួបរួមគ្នាដោយគ្មានមន្ទិលសង្ស័យ។ គ្រប់យ៉ាងត្រូវតែសម្រេចឲ្យបានតាមដែលអាច ដើម្បីធានាថា នៅចំពោះមុខការគំរាមកំហែងរបស់រុស្ស៊ី ឬការកើនឡើងនូវឥទ្ធិពលរបស់ចិន យើងមិនមានការឈ្លោះគ្នាឯង រវាងសម្ព័ន្ធមិត្តនោះទេ»៕