UN៖ ប្រធានអង្គការសហប្រជាជាតិលោក Antonio Guterres បានប្រាប់ទីភ្នាក់ងារសារព័ត៌មាន AP ថា គោលដៅនៃការកាត់បន្ថយការឡើងកំដៅភពផែនដីដល់ ១.៥អង្សាសេគឺផ្ដោតលើការសង្គ្រោះជីវិត។ លោកបាននិយាយថា កិច្ចប្រជុំកំពូលស្ដីពីបម្រែបម្រួលអាកាសធាតុលើកទី២៦ របស់អង្គការសហប្រជាជាតិ (COP26) ប្រហែលជាពុំបានមើលឃើញរដ្ឋាភិបាលធ្វើការសន្យា ដែលជាតម្រូវការចាំបាច់ក្នុងការកាត់បន្ថយការបំភាយឧស្ម័នផ្ទះកញ្ចក់ឱ្យបានគ្រប់គ្រាន់នោះទេ។
សម្ពាធកំពុងកើនឡើងសម្រាប់ប្រទេសនានាដើម្បីធ្វើកិច្ចព្រមព្រៀងដ៏មានអត្ថន័យមួយ មុនពេលកិច្ចប្រជុំកំពូលបញ្ចប់នៅថ្ងៃទី១២ ខែវិច្ឆិកានេះ។ ប៉ុន្តែអគ្គលេខាធិការអង្គការសហប្រជាជាតិរូបនេះក៏បាននិយាយផងដែរថា ក្តីសង្ឃឹមនៅតែមានរហូតដល់នាទីចុងក្រោយ។ ក្រុមអ្នកវិទ្យាសាស្ត្រនិយាយថា ការកាត់បន្ថយសីតុណ្ហភាពពិភពលោកឡើងដល់ត្រឹម ១.៥អង្សាសេនឹងជួយមនុស្សជាតិឱ្យជៀសផុតពីផលប៉ះពាល់អាកាសធាតុដ៏អាក្រក់បំផុត។ នេះគឺប្រៀបធៀបទៅនឹងសីតុណ្ហភាពមុនសម័យធ្វើឧស្សាហកម្ម។ នៅទីក្រុងប៉ារីសកាលពីឆ្នាំ២០១៥ មេដឹកនាំពិភពលោកបានសន្យាថា នឹងព្យាយាមទប់ពិភពលោកពីការឡើងកំដៅលើសពីចន្លោះពី ១.៥អង្សាសេ ទៅ ២អង្សាសេ តាមរយៈការកាត់បន្ថយការបញ្ចេញឧស្ម័នផ្ទះកញ្ចក់។ ការព្យាករណ៍ចុងក្រោយគឺសីតុណ្ហភាពនឹងកើនឡើងដល់កម្រិត ២.៧អង្សាសេ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
