អង្គការមនុស្សធម៌របស់អង្គការសហប្រជាជាតិ បាននិយាយកាលពីថ្ងៃច័ន្ទថា សាកសពនៅតាមដងផ្លូវ ទឹកមិនស្អាត និងរដូវភ្លៀងធ្លាក់ខ្លាំង បង្កឱ្យមានហានិភ័យដល់សុខភាពនៅក្នុងទីក្រុង Goma សាធារណរដ្ឋប្រជាធិបតេយ្យកុងហ្គោ (DRC) ។

ការិយាល័យសម្របសម្រួលកិច្ចការមនុស្សធម៌ (OCHA) បាននិយាយថា «នៅតែមានសាកសពមនុស្សដែលបានស្លាប់នៅក្នុងអំពើហិង្សា នៅតាមដងផ្លូវក្នុងទីក្រុង Goma»។ «កន្លែងដាក់សពពេញ ហើយមន្ទីរពេទ្យ និងមណ្ឌលសុខភាព ពេញដោយអ្នករងរបួស»។

អង្គការ OCHA បាននិយាយថា ខណៈកិច្ចខិតខំប្រឹងប្រែងដើម្បីសម្លាប់មេរោគដោយប្រើម្សៅក្ល័រ កំពុងធ្វើឡើង ដោយមានការគាំទ្រពីដៃគូមនុស្សធម៌ ហើយកង្វះទឹកទទួលទានកំពុងបង្ខំឱ្យប្រជាជននៅក្នុងទីក្រុង Goma ពឹងផ្អែកលើទឹកពុំបានធ្វើប្រព្រឹត្តិកម្មពីបឹង Kivu ហើយរដូវវស្សា ធ្វើឱ្យបញ្ហាកាន់តែធ្ងន់ធ្ងរ។ ឧក្រិដ្ឋកម្ម គឺជាកត្តាស្មុគស្មាញមួយផ្សេងទៀត បន្ទាប់ពីការវាយលុកកាលពីសប្តាហ៍មុនដោយក្រុមឧទ្ទាម M23 ។

ការិយាល័យនេះ បាននិយាយថា អង្គការមនុស្សធម៌ចំនួនពីរ និងអង្គភាពរដ្ឋាភិបាល បានរាយការណ៍ថា រថយន្តជាច្រើនគ្រឿងត្រូវបានស្ទាក់ប្លន់កាលពីចុងសប្តាហ៍។

អង្គការ OCHA បាននិយាយថា អង្គការផ្តល់ជំនួយ កំពុងវាយតម្លៃពីផលប៉ះពាល់នៃការចូលលួចនៅឃ្លាំងរបស់ពួកគេ ខណៈពួកគេព្យាយាមបន្តការចែកចាយជំនួយនៅក្នុងនិងជុំវិញទីរួមខេត្ត North Kivu ។

ទោះជាយ៉ាងណា ការិយាល័យបាននិយាយថា សកម្មភាពសេដ្ឋកិច្ច និងសកម្មភាពផ្សេងៗទៀត កំពុងដំណើរការឡើងវិញជាបណ្តើរៗ ប៉ុន្តែសាលារៀន និងធនាគារ នៅតែបិទនៅទីក្រុង Goma ។