ក្រុមមន្ត្រីបាននិយាយកាលពីថ្ងៃចន្ទថា ប្រទេសប៉ាគីស្ថាន បានគំរាមនិរទេសជនភៀសខ្លួនអាហ្វហ្គានីស្ថានដែលកំពុងរង់ចាំការផ្លាស់ទីលំនៅ ប្រសិនបើករណីរបស់ពួកគេ មិនដំណើរការបានឆាប់រហ័សដោយរដ្ឋាភិបាលម្ចាស់ផ្ទះនោះទេ។

ប្រជាជនអាហ្វហ្គានីស្ថានរាប់ម៉ឺននាក់ បានភៀសខ្លួនទៅកាន់ប្រទេសប៉ាគីស្ថានដែលនៅជិតខាង បន្ទាប់ពីក្រុមតាលីបង់ បានចូលមកគ្រប់គ្រងក្នុងឆ្នាំ ២០២១ ហើយត្រូវបានអនុម័តសម្រាប់ការតាំងទីលំនៅថ្មី នៅក្នុងសហរដ្ឋអាមេរិក តាមរយៈកម្មវិធីដែលជួយមនុស្សដែលមានហានិភ័យ ដោយសារតែការងាររបស់ពួកគេ ជាមួយរដ្ឋាភិបាលអាមេរិក ប្រព័ន្ធផ្សព្វផ្សាយ បណ្តាទីភ្នាក់ងារជំនួយ និងក្រុមសិទ្ធិមនុស្ស។

ទោះបីជាយ៉ាងណាក៏ដោយ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានផ្អាកកម្មវិធីជនភៀសខ្លួនអាមេរិក កាលពីខែមុន ជនជាតិអាហ្វហ្គានីស្ថានប្រហែល ២០.000នាក់ បច្នុប្បន្ន កំពុងស្ថិតក្នុងភាពមិនប្រាកដប្រជា នៅក្នុងប្រទេសប៉ាគីស្ថាន។

រដ្ឋបាលរបស់លោក ត្រាំ ក៏បានប្រកាសថា កម្មវិធីទទួលជនភៀសខ្លួនរបស់សហរដ្ឋអាមេរិក នឹងត្រូវផ្អាកចាប់ពីថ្ងៃទី ២៧ ខែមករា យ៉ាងហោចណាស់ ៣ខែ ដែលជំរុញឲ្យមានការព្រួយបារម្ភ ចំពេលដែលអាជ្ញាធរប៉ាគីស្ថាន គំរាមនិរទេសជនភៀសខ្លួន។

យោងតាមមន្ត្រីសន្តិសុខពីរនាក់ បានឲ្យដឹងថា នាយករដ្ឋមន្ត្រីប៉ាគីស្ថានលោក Shehbaz Sharif បានសម្រេចចិត្ត កាលពីសប្តាហ៍មុនថា ជនភៀសខ្លួននឹងត្រូវនិរទេសត្រឡប់ទៅប្រទេសអាហ្វហ្គានីស្ថានវិញ ប្រសិនបើករណីរបស់ពួកគេ មិនត្រូវបានដំណើរការឆាប់រហ័សទេ។ ពួកគេបាននិយាយក្នុងលក្ខខណ្ឌមិនបញ្ចេញឈ្មោះ ខណៈដែលពួកគេ មិនត្រូវបានអនុញ្ញាតឲ្យនិយាយជាមួយប្រព័ន្ធផ្សព្វផ្សាយ អំពីកំណត់ត្រានោះ។