មន្ត្រីសេតវិមានបាននិយាយថា ប្រធានាធិបតីអាមេរិក លោក Donald Trump បានអញ្ជើញនាយករដ្ឋមន្ត្រីឥណ្ឌា លោក Narendra Modi ទៅទស្សនកិច្ចនៅសេតវិមាននៅសប្តាហ៍ក្រោយនេះ ប៉ុន្មានម៉ោងបន្ទាប់ពីយន្តហោះយោធាអាមេរិក បានចេញដំណើរដើម្បីបញ្ជូនជនអន្តោប្រវេសន៍និរទេសត្រឡប់ទៅឥណ្ឌាវិញ។

លោក Trump បានពិភាក្សាជាមួយលោក Modi កាលពីថ្ងៃទី២៧ ខែមករា ដោយបានលើកឡើងអំពីបញ្ហាអន្តោប្រវេសន៍ និងបានសង្កត់ធ្ងន់លើសារៈសំខាន់នៃការទិញឧបករណ៍សន្តិសុខដែលផលិតដោយអាមេរិកបន្ថែមទៀត និងទំនាក់ទំនងពាណិជ្ជកម្មទ្វេភាគីដោយយុត្តិធម៌។

ឥណ្ឌា ដែលជាដៃគូយុទ្ធសាស្ត្ររបស់សហរដ្ឋអាមេរិក ក្នុងកិច្ចខិតខំប្រឹងប្រែងរបស់ខ្លួនដើម្បីទប់ទល់នឹងប្រទេសចិន មានបំណងចង់ពង្រឹងទំនាក់ទំនងពាណិជ្ជកម្មជាមួយទីក្រុងវ៉ាស៊ីនតោន និងធ្វើឱ្យកាន់តែងាយស្រួលសម្រាប់ពលរដ្ឋរបស់ខ្លួនក្នុងការទទួលបានទិដ្ឋាការកម្មករជំនាញ។

ទីក្រុងដេលី ក៏មានបំណងចង់បញ្ចៀសពន្ធដែលលោក Trump បានគំរាមកំហែងនាពេលកន្លងមកផងដែរ ដោយលើកឡើងពីពន្ធដ៏ខ្ពស់របស់ឥណ្ឌា លើផលិតផលអាមេរិក។ សហរដ្ឋអាមេរិក គឺជាដៃគូពាណិជ្ជកម្មដ៏ធំបំផុតរបស់ឥណ្ឌា ហើយពាណិជ្ជកម្មទ្វេភាគីរវាងប្រទេសទាំងពីរបានកើនឡើងលើសពី ១១៨ពាន់លានដុល្លារក្នុងឆ្នាំ២០២៣/២៤ ដោយឥណ្ឌា បានប្រកាសអតិរេកពាណិជ្ជកម្មចំនួន ៣២ពាន់លានដុល្លារ៕