នាយករដ្ឋមន្ត្រីបារាំង លោក Francois Bayrou (ហ្វ្រង់ស្វ័រ បាយរ៉ូ) បានអនុម័តសេចក្ដីព្រាងច្បាប់ថវិកាឆ្នាំ២០២៥ ទាំងបង្ខំ ដោយមិនបានឆ្លងកាត់សភាជាន់ទាប កាលពីថ្ងៃចន្ទ (ទី៣ ខែកុម្ភៈ) ដោយប្រើប្រាស់បទប្បញ្ញត្តិរដ្ឋធម្មនុញ្ញ ដែលការធ្វើបែបនេះទំនងជានឹងបង្កឲ្យមានការបោះឆ្នោតដកសេចក្ដីទុកចិត្ត។

ក្រុមឆ្វេងនិយមជ្រុល គឺគណបក្ស France Unbowed (LFI) បាននិយាយរួចហើយថា ខ្លួននឹងដាក់ញត្តិដកសេចក្ដីទុកចិត្ត ដែលទំនងជានឹងត្រូវបានបោះឆ្នោត នៅថ្ងៃពុធ។ តែថ្នាក់ដឹកនាំគណបក្ស Socialist (PS) បាននិយាយថា ប្រសិនបើសមាជិកបក្សធ្វើតាមការណែនាំ ខ្លួននឹងមិនគាំទ្រញ្ញត្តិនេះទេ ដែលនឹងជួយការពាររដ្ឋាភិបាលមិនឲ្យដួលរលំ ។

ចំណែកក្រុមប្រឆាំងជនអន្តោប្រវេសន៍របស់លោកស្រី Marine Le Pen គឺគណបក្ស National Rally (RN) មិនទាន់ផ្តល់ការបញ្ជាក់ច្បាស់លាស់នៅឡើយទេថា តើខ្លួននឹងបោះឆ្នោតគាំទ្រញត្តិនេះ ឬអត់។ អ្នកនាំពាក្យគណបក្ស បានប្រាប់ថា គណបក្សនឹងប្រកាសផែនការរបស់ខ្លួន នារសៀលថ្ងៃពុធ។

គួរបញ្ជាក់ថា នយោបាយរបស់ប្រទេសបារាំង បានស្ថិតក្នុងភាពចលាចល ចាប់តាំងពីប្រធានាធិបតីបារាំងលោក Emmanuel Macron បានប្រកាសពីការបោះឆ្នោតមុនអាណត្តិ កាលពីរដូវក្តៅឆ្នាំមុន ដែលបានធ្វើឲ្យរដ្ឋសភាបែកជាក្រុមប្រឆាំងចំនួន ៣ប្លុក។ បក្ស NR បានក្លាយជាគណបក្សធំជាងគេតែមួយគត់ នៅក្នុងសភាជាន់ទាប ដោយបានធ្វើឲ្យលោកស្រី Le Pen ស្ថិតនៅក្នុងតួនាទីដ៏មានឥទ្ធិពលមិនធម្មតា។

លោក Bayrou បានអំពាវនាវដល់សមាជិកសភាកុំឲ្យផ្តួលរំលំរដ្ឋាភិបាលរបស់លោក ហើយទទួលយកសេចក្ដីព្រាងច្បាប់ថវិកាដែលលោកបានបង្ខំឲ្យមានការអនុម័តនេះ។ លោកបាននិយាយថា៖ «ប្រសិនបើអ្នកសម្រេចចិត្ត ចាប់តាំងពីវាស្ថិតនៅក្នុងដៃរបស់អ្នកនោះ ក្នុងរង្វង់ ១០ថ្ងៃ ប្រទេសបារាំងនឹងមានថវិកា ដែលនឹងបញ្ជូនសញ្ញាពីការទទួលខុសត្រូវ និងស្ថិរភាពដល់អ្នកដែលមានការបារម្ភបំផុត អ្នកដែលមានកង្វល់ជាមួយនឹងហេតុផលត្រឹមត្រូវ និងបងប្អូនជនរួមជាតិរបស់យើង»៕