ប្រធានាធិបតីអាមេរិក លោក Donald Trump បាននិយាយថា លោកនឹងកាត់បន្ថយការផ្តល់មូលនិធិទាំងអស់ដល់ប្រទេសអាហ្វ្រិកខាងត្បូង ដោយសារអ្វីដែលលោកហៅថា ការរំលោភសិទ្ធិមនុស្ស ជាចំណាត់ដែលឆ្លុះបញ្ចាំងពីការអះអាងម្តងហើយម្តងទៀត និងមិនពិតរបស់លោក Elon Musk ក្នុងរយៈពេលជាច្រើនឆ្នាំ ដែលថា អាជ្ញាធរនៅក្នុងប្រទេសកំណើតរបស់ខ្លួនរើសអើងជនជាតិស្បែកស និងលោកថែមទាំងនិយាយថា ប្រជាជនត្រូវបានជំរុញឲ្យសម្លាប់ប្រជាជនស្បែកសទៀតផង។

កាលពីថ្ងៃអាទិត្យចុងសប្ដាហ៍កន្លងមក ដោយមិនបានផ្តល់ព័ត៌មានឲ្យជាក់លាក់ លោក Trump បានប្រាប់ថា៖ «រឿងដ៏គួរឲ្យភ័យខ្លាច កំពុងកើតឡើងនៅអាហ្វ្រិកខាងត្បូង។ អ្នកដឹកនាំនៃប្រទេសនេះ កំពុងធ្វើរឿងដ៏គួរឲ្យភ័យខ្លាច និងរឿងដ៏គួរឲ្យរន្ធត់»។ លោកបានបន្ថែមថា៖ «ពួកគេដណ្ដើមរឹបអូសយកដីធ្លី ហើយជាក់ស្ដែង ពួកគេកំពុងធ្វើអ្វីដែលប្រហែលជាអាក្រក់ជាងនេះទៅទៀត»។

បើទោះបីជាវាមិនមានភាពច្បាស់លាស់ថា តើលោក Trump សំដៅទៅលើអ្វីនោះ ក៏លោកហាក់ដូចជាកំពុងនិយាយពាក់ព័ន្ធនឹងច្បាប់ថ្មីមួយ នៅអាហ្វ្រិកខាងត្បូង ដែលផ្តល់សិទ្ធិអំណាចដល់រដ្ឋាភិបាល ក្នុងករណីខ្លះ ឲ្យដកហូតដីធ្លីពីប្រជាជន។

លោក Musk ដែលជាសម្ព័ន្ធមិត្តដ៏ជិតស្និទ្ធរបស់លោក Trump និងជាប្រធានក្រសួងប្រសិទ្ធភាពរដ្ឋាភិបាលថ្មីរបស់លោកប្រធានាធិបតី បានគូសបញ្ជាក់ពីច្បាប់នោះ តាមរយៈការបង្ហោះលើបណ្ដាញសង្គមនាពេលថ្មីៗនេះ ហើយបានពណ៌នាច្បាប់នេះថា ជាការគំរាមកំហែងដល់ជនជាតិភាគតិចស្បែកសរបស់អាហ្វ្រិកខាងត្បូង។

ប្រជាជនអាហ្រ្វិកខាងត្បូងជាច្រើន បានចាត់ទុកការសន្យាភ្លាមៗរបស់លោក Trump ក្នុងការដាក់ទណ្ឌកម្មដៃគូពាណិជ្ជកម្មដ៏ធំបំផុតរបស់អាមេរិក នៅទ្វីបអាហ្រ្វិកថា ជារឿងគួរឲ្យភ្ញាក់ផ្អើល ហើយយ៉ាងហោចណាស់ ក៏រងឥទ្ធិពលមួយផ្នែកពីម្ចាស់ក្រុមហ៊ុន Tesla គឺលោកមហាសេដ្ឋី Musk ដែលកើតនៅរដ្ឋធានី Pretoria របស់អាហ្វ្រិកខាងត្បូង ប៉ុន្តែបានចាកចេញទៅប្រទេសកាណាដា បន្ទាប់ពីលោកបានរៀនចប់វិទ្យាល័យ៕