អាជ្ញាធរ នៅថ្ងៃអង្គារ (ទី៤ ខែកុម្ភៈ) នេះ បានប្រាប់ឲ្យដឹងថា ទឹកជំនន់ បានជន់លិចផ្ទះសម្បែងជាច្រើនខ្នង និងបណ្តាលឲ្យមានការខូចខាត «ដ៏មិនគួរឲ្យជឿ» នៅភាគខាងកើតប្រទេសអូស្ត្រាលី ដោយព្រមានអំពីការស្តារស្ថានភាពឡើងវិញ ដែលចំណាយពេលច្រើនសប្ដាហ៍។

គួរបញ្ជាក់ថា ក្រុមមន្ត្រីបានប្រាប់ថា ព្យុះបាននាំឲ្យមានទឹកភ្លៀងកម្រិតជាង ១,៥ម៉ែត្រ នៅតំបន់មួយចំនួននៃរដ្ឋ Queensland ក្នុងសប្តាហ៍មុន ដោយបានលិចផ្ទះសម្បែង កន្លែងអាជីវកម្ម និងផ្លូវថ្នល់។

ជាមួយគ្នានេះ ក្រុមមន្ត្រី បានបន្ថែមទៀតថា អ្នកស្រុកទីក្រុង Townsville ត្រូវបានអនុញ្ញាតឲ្យត្រឡប់ទៅផ្ទះសម្បែងរបស់ពួកគេវិញ នៅថ្ងៃទី៤ ខែកុម្ភៈ ប៉ុន្តែគួរតែនៅតែប្រុងបប្រយ័ត្ន ជាមួយនឹងការមានការបញ្ជាជម្លៀសបន្ថែម។

នៅក្នុងបទសម្ភាសន៍ដាច់ដោយឡែកមួយជាមួយទូរទស្សន៍ជាតិ ABC រដ្ឋមន្ត្រីរដ្ឋ Queensland លោក David Crisafulli បាននិយាយថា ភាគខាងជើង Ingham ជាទីក្រុងជនបទដែលមានប្រជាជនប្រហែល ៤.៥០០នាក់ ទឹកទំនងជាបានជន់លិចផ្ទះចំនួន ១០០ខ្នង។ ហើយលោកបានប្រាប់ថា៖ «ការស្ដារស្ថានភាពឲ្យប្រសើរឡើងវិញ ត្រូវប្រើពេលយ៉ាងតិចបំផុតមួយសប្តាហ៍ ឬមួយខែ»៕