មេបញ្ជាការយោធាជាន់ខ្ពស់របស់កូរ៉េខាងត្បូង នៅថ្ងៃអង្គារ (ទី៤ ខែកុម្ភៈ) បាននិយាយថា លោកជឿជាក់ថា ប្រធានាធិបតី លោក Yoon Suk Yeol ធ្វើការសម្រេចចិត្តស្របច្បាប់ នៅពេលលោកប្រកាសច្បាប់អាជ្ញាសឹក ប៉ុន្តែបានបដិសេធមិននិយាយថា តើមេដឹកនាំដែលត្រូវបានចោទប្រកាន់ទម្លាក់តំណែងរូបនេះ បានផ្តល់បទបញ្ជាឲ្យ «យក» សមាជិកសភាចេញពីរដ្ឋសភាដែរ ឬទេ។

ឧត្តមសេនីយ៍ឯក លោក Lee Jin-woo បានផ្តល់សក្ខីកម្មនៅឯការកាត់ក្តីរបស់តុលាការធម្មនុញ្ញ ដែលពិនិត្យមើលការចោទទម្លាក់តំណែងរបស់សភាលើលោក Yoon ដែលត្រូវបានចោទប្រកាន់ពីបទរៀបចំឲ្យមានកុបកម្ម ដោយការចេញក្រឹត្យច្បាប់អាជ្ញាសឹករយៈពេលខ្លីរបស់លោក កាលពីថ្ងៃទី៣ ខែធ្នូឆ្នាំមុន។

លោក Yoon ជាថ្មីម្តងទៀត បាននិយាយសម្រាលដល់ការប្រកាសច្បាប់អាជ្ញាសឹករបស់លោក ដែលបានធ្វើឲ្យប្រទេសភ្ញាក់ផ្អើល ខណៈដែលវិធានការនេះបានរុញឲ្យមហាអំណាចឧស្សាហកម្ម និងជាប្រទេសគំរូដ៏មានឥទ្ធិពលនៃការប្រកាន់ខ្ជាប់លទ្ធិប្រជាធិបតេយ្យ ធា្លក់ទៅក្នុងវិបត្តិរដ្ឋធម្មនុញ្ញ ដែលក៏បានឃើញនាយករដ្ឋមន្ត្រីរងចោទប្រកាន់ទម្លាក់តំណែងផងដែរ។

យ៉ាងណាក្ដី អំឡុងពេលផ្ដល់សក្ខីកម្ម លោក Lee បានប្រាប់តុលាការថា៖ «ខ្ញុំនៅតែជឿថា វាស្របច្បាប់ ហើយនៅពេលប្រាប់ទៅសភា ខ្ញុំបានចាត់ទុកវាជាក្រឹត្យមួយ។ វាមិនមានសូម្បីតែឱកាសគិតថា តើវាខុសច្បាប់ ឬមិនស្របតាមរដ្ឋធម្មនុញ្ញនោះឡើយ នៅពេលដែលអគ្គមេបញ្ជាការ ដែលតំណាងឲ្យប្រជាពលរដ្ឋ និងដែលខ្ញុំដឹងថា ជាអ្នកជំនាញផ្នែកច្បាប់ ក្នុងនាមជាអតីតរដ្ឋអាជ្ញាជាន់ខ្ពស់ម្នាក់ បាននិយាយទៅកាន់ប្រទេស និងទៅកាន់ពិភពលោក»។

គួរបញ្ជាក់ថា តុលាការធម្មនុញ្ញកំពុងពិនិត្យមើលការចោទប្រកាន់ទម្លាក់តំណែងរបស់សភា ចំពោះលោក Yoon កាលពីថ្ងៃទី១៤ ខែធ្នូ ហើយនឹងសម្រេចថា តើត្រូវដកតំណែងលោកជាអចិន្ត្រៃយ៍ ឬប្រគល់ឲ្យលោកវិញ។ ប្រសិនបើរូបលោកត្រូវបានបញ្ចប់តំណែង ការបោះឆ្នោតប្រធានាធិបតីថ្មី ត្រូវតែធ្វើឡើងក្នុងរង្វង់ ៣ខែ៕