ប្រទេសចិន នៅថ្ងៃអង្គារ (ទី៤ ខែកុម្ភៈ) នេះ បានប្រកាសនូវវិធានការដ៏ធំទូលាយដែលផ្តោតលើអាជីវកម្មរបស់អាមេរិក ក្នុងនោះរួមទាំងក្រុមហ៊ុនបច្ចេកវិទ្យា Google ក្រុមហ៊ុនផលិតឧបករណ៍កសិកម្ម និងម្ចាស់យីហោម៉ូដ Calvin Klein ដោយចំណាត់ការនេះកើតមានឡើងប៉ុន្មាននាទីបន្ទាប់ពីការដំឡើងពន្ធថ្មីរបស់សហរដ្ឋអាមេរិកលើទំនិញចិន ចូលជាធរមាន។

គួរបញ្ជាក់ថា ទីក្រុងប៉េកាំងក៏បានដំឡើងពន្ធផងដែរលើផលិតផលអាមេរិកជាច្រើន ដូចជាធ្យូងថ្ម ប្រេង និងរថយន្តមួយចំនួន ជាការឆ្លើយតបយ៉ាងឆាប់រហ័ស ចំពោះការយកពន្ធថ្មីលើទំនិញចិនដែលដាក់ដោយប្រធានាធិបតីអាមេរិក លោក Donald Trump ដោយនេះបាននាំឲ្យភាពតានតឹងផ្នែកពាណិជ្ជកម្មឡើងកម្ដៅខ្លាំងទៅៗ រវាងប្រទេសដែលមានសេដ្ឋកិច្ចធំជាងគេទាំង២ របស់ពិភពលោក។

រដ្ឋបាលរដ្ឋរបស់ប្រទេសចិនទទួលបន្ទុកបទប្បញ្ញត្តិទីផ្សារ បានឲ្យដឹងថា Google ត្រូវបានសង្ស័យថា បានបំពានច្បាប់ប្រឆាំងភាពផ្តាច់មុខរបស់ប្រទេស ហើយការស៊ើបអង្កេតមួយត្រូវបានផ្តួចផ្តើមឡើងស្របតាមច្បាប់។

ដោយឡែក ក្រសួងពាណិជ្ជកម្មចិន បានប្រាប់ថា PVH Corp ជាក្រុមហ៊ុនកាន់កាប់ម៉ាកល្បីៗ ដែលរួមមាន Calvin Klein និង Tommy Hilfiger និងក្រុមហ៊ុនជីវបច្ចេកវិទ្យាអាមេរិក Illumina ត្រូវបានដាក់ទៅក្នុងបញ្ជី «អង្គភាពមិនគួរឲ្យទុកចិត្ត» របស់ខ្លួន។

ក្រសួងបានបន្ថែមថា ក្រុមហ៊ុនទាំង២ បានអនុវត្តនូវអ្វីដែលគេហៅថា «វិធានការរើសអើងប្រឆាំងនឹងសហគ្រាសចិន» និង «ធ្វើឲ្យប៉ះពាសល់» សិទ្ធិ និងផលប្រយោជន៍ស្របច្បាប់របស់ក្រុមហ៊ុនចិន។

ក្រុមហ៊ុនដែលត្រូវបានបញ្ចូលទៅក្នុងបញ្ជីខ្មៅ អាចប្រឈមនឹងការផាកពិន័យ និងការដាក់ទណ្ឌកម្មយ៉ាងទូលំទូលាយផ្សេងទៀត ក្នុងនោះរួមទាំងការបង្កកពាណិជ្ជកម្ម និងការដកហូតប័ណ្ណការងារ សម្រាប់បុគ្គលិកបរទេស។ ពាក់ព័ន្ធនឹងករណីនេះ ទាំង Google, PVH និង Illumina មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ នៅក្រៅម៉ោងធ្វើការធម្មតារបស់សហរដ្ឋអាមេរិក៕