ក្រុមមន្ត្រី បាននិយាយកាលពីថ្ងៃអង្គារ ទី៤ ខែកុម្ភៈ ថា ក្រុមបុគ្គលិកជួយសង្គ្រោះ បានរកឃើញសាកសពមនុស្សទាំងអស់៦៧នាក់ ដែលបានស្លាប់នៅពេលយន្តហោះដឹកអ្នកដំណើរមួយគ្រឿង និងឧទ្ធម្ភាគចក្ររបស់កងទ័ពសហរដ្ឋអាមេរិក បុកគ្នានៅពាក់កណ្តាលអាកាសនៅទីក្រុងវ៉ាស៊ីនតោន ហើយបានធ្លាក់ចូលទៅក្នុងទន្លេ Potomac ។

សេចក្តីថ្លែងការណ៍ពីទីភ្នាក់ងាររដ្ឋាភិបាលជាច្រើនដែលពាក់ព័ន្ធនឹងកិច្ចខិតខំប្រឹងប្រែងជួយសង្គ្រោះក្រោយការធ្លាក់យន្តហោះនៅសហរដ្ឋអាមេរិក ដែលមានមនុស្សស្លាប់ច្រើនបំផុតក្នុងរយៈពេល២០ឆ្នាំមកនេះ បាននិយាយថា សាកសពទាំងអស់ត្រូវបានកំណត់អត្តសញ្ញាណ លើកលែងតែសាកសពម្នាក់។

សេចក្តីថ្លែងការណ៍ បានចាត់ទុកការបញ្ចប់ការស្វែងរកថា នៅតែជា «ជំហានដ៏សំខាន់» ឆ្ពោះទៅរកការបិទបញ្ចប់ចំពោះក្រុមគ្រួសារអ្នកដែលបានស្លាប់នៅក្នុងឧបទ្ទវហេតុ កាលពីសប្តាហ៍មុន។

សេចក្តីថ្លែងការណ៍បាននិយាយថា «បេះដូងរបស់យើងនៅជាមួយគ្រួសារជនរងគ្រោះ ខណៈពួកគេស្វែងរកមនុស្សជាទីស្រលាញ់របស់ពួកគេ ក្នុងសោកនាដកម្មនេះ»។

ក្រុមបុគ្គលិកសង្គ្រោះ បន្តធ្វើការដើម្បីទាញយកបំណែកយន្តហោះដឹកអ្នកដំណើរ CRJ-700 ដែលធ្វើប្រតិបត្តិការដោយក្រុមហ៊ុនអាកាសចរណ៍ American Eagle ពីក្នុងទឹកដ៏ត្រជាក់នៃទន្លេ Potomac ។