ប្រទេសចិនគ្រោងបញ្ជូនរូបយន្តទៅកាន់ផ្នែកឆ្ងាយនៃភពព្រះចន្ទនៅឆ្នាំក្រោយ ដើម្បីស្វែងរកទឹកកក ដែលអាចរក្សាគន្លឹះនៃការរុករកលើភពព្រះចន្ទនាពេលអនាគត ខណៈប្រទេសនេះកំពុងឆ្ពោះទៅមុខពោពេញដោយមហិច្ឆតាមួយនឹងកម្មវិធីអវកាសរបស់ខ្លួន។

ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃចន្ទសប្ដាហ៍នេះថា រូបយន្តដែលជាឧបករណ៍ចាប់សញ្ញាហោះហើរ នឹងត្រូវដាក់ពង្រាយទៅកាន់ប៉ូលខាងត្បូងរបស់ភពព្រះចន្ទ ជាផ្នែកនៃបេសកកម្ម Chang'e-7 របស់ប្រទេសចិន ដែលមានគោលបំណងនាំប្រទេសនេះឱ្យខិតទៅកាន់តែជិតដើម្បីឲ្យក្រុមអវកាសយានិក ចុះចតនៅលើព្រះចន្ទក្នុងរយៈពេលប្រាំឆ្នាំ។

ប្រទេសចិនបានខិតខំប្រឹងប្រែងយ៉ាងខ្លាំងក្នុងការបង្កើតខ្លួនជាតួអង្គសំខាន់ក្នុងលំហ ជាដែនក្នុងវាលលំហដែលប្រទេសនានា រួមទាំងសហរដ្ឋអាមេរិកកំពុងសម្លឹងមើលកាន់តែខ្លាំង មិនត្រឹមតែដើម្បីផលប្រយោជន៍វិទ្យាសាស្ត្រប៉ុណ្ណោះទេ ប៉ុន្តែថែមទាំងសម្លឹងមើលធនធាន និងសន្តិសុខជាតិផងដែរ។

ទោះយ៉ាងណាក៏ដោយ ការស្វែងរកទឹកនៅលើឋានព្រះចន្ទនឹងគ្មានអ្វីថ្មីទេ។ កាលពីឆ្នាំមុន ក្រុមអ្នកវិទ្យាសាស្ត្រចិនបានរកឃើញទឹកនៅក្នុងសំណាកដីពីការស៊ើបអង្កេតលើភពព្រះចន្ទរបស់បេសកកម្ម Chang'e-5 ខណៈអង្គការណាសារបស់សហរដ្ឋអាមេរិក និងយានអវកាសឥណ្ឌាកាលពីកន្លងទៅធ្លាប់បានប្រទះឃើញ អ្វីដែលពួកគេជឿថាជាទឹកនៅលើផ្ទៃភពព្រះចន្ទ៕