សង្គ្រាមបានបំផ្លិចបំផ្លាញប្រព័ន្ធថែទាំសុខភាពក្នុងប្រទេសយេម៉ែន ដែលឥឡូវនេះកំពុងប្រឈមមុខនឹងវិបត្តិនយោបាយ មនុស្សធម៌ និងការអភិវឌ្ឍដ៏អូសបន្លាយ ដែលធ្វើឱ្យអ្នកជំងឺមហារីករាប់ពាន់នាក់គ្មានការធ្វើរោគវិនិច្ឆ័យ ឬការថែទាំត្រឹមត្រូវ។

ខណៈពិភពលោកប្រារព្ធទិវាមហារីកពិភពលោកនៅថ្ងៃទី០៤ ខែកុម្ភៈ ដោយការលើកកម្ពស់ការយល់ដឹង និងការធ្វើឱ្យប្រសើរឡើងនូវការការពារ និងការស្វែងរកការព្យាបាល មនុស្សប្រហែល ៨០.០០០នាក់នៅក្នុងប្រទេសយេម៉ែនកំពុងទទួលរងទុក្ខវេទនាពីជំងឺនេះ។

ជារៀងរាល់ឆ្នាំ ករណីថ្មីចំនួន ៣០.០០០នាក់ ត្រូវបានកត់ត្រា ភាគច្រើនដោយសារផលវិបាកនៃសង្រ្គាមដែលកំពុងបន្តចាប់តាំងពីឆ្នាំ២០១៤ ដោយសារអាវុធហាមឃាត់ជាអន្តរជាតិ ត្រូវបានប្រើប្រាស់។ នៅពេលពិភពលោកប្រឹងប្រែងកែលម្អវិធីសាស្រ្តនៃការព្យាបាលនៅកន្លែងផ្សេង ប្រព័ន្ធថែទាំសុខភាពរបស់យេម៉ែន ប្រឈមមុខនឹងបញ្ហាធំៗជាច្រើន។

វិស័យថែទាំសុខភាពយេម៉ែន កំពុងឈានទៅដល់ការដួលរលំ ដោយមានកង្វះខាតថ្នាំពេទ្យ និងឧបករណ៍សំខាន់ៗសម្រាប់ព្យាបាលជំងឺមហារីក ដូចជាសារធាតុវិទ្យុសកម្ម រួមទាំងអ៊ីយ៉ូតផងដែរ។ អ្នកជំងឺជាង ៣២០.០០០នាក់ មិនអាចធ្វើដំណើរទៅព្យាបាលបានទេ ដោយសារការបិទព្រលានយន្តហោះរដ្ឋធានី។ អង្គការសហប្រជាជាតិបានព្រមានពីគ្រោះមហន្តរាយសុខភាពដែលនឹងកើតឡើង លុះត្រាតែមានជំនួយជាបន្ទាន់៕