​កេ​ន​យ៉ា​៖ សកម្មជន​បរិស្ថាន និង​មន្ត្រី​កម្មវិធី​ស្បៀងអាហារ​ពិភពលោក​នៅ​ប្រទេស​កេ​ន​យ៉ា​ភាគ​ខាងជើង​បាន​និយាយ​ថា គ្រោះ​រាំងស្ងួតខ្លាំង​ដែល​បង្កឡើង​ដោយ​ការប្រែប្រួល​អាកាសធាតុ​បាន​ប្រែ​ក្លាយ​អ្វី​ដែល​ធ្លាប់​ជា "​ទឹកដី​ដ៏​បរិបូរណ៍​" ទៅជា​កន្លែង​ដែល​មនុស្ស​កំពុង​តស៊ូដើម្បី​ស្វែងរក​អាហារ​។​

​ទន្លេ​ក្នុង​តំបន់ Nakaria ជិត​ទីក្រុង Kalokol គឺជា​ទន្លេ​ដែល​មាន​ទឹក​ច្រើន​ក្នុង​រដូវវស្សា មានន័យថាមាន​ទឹក​ហូរ​តែ​នៅ​ពេល​មាន​ភ្លៀង និង​ហួតហែង​នៅ​ពេល​គ្មាន​ភ្លៀង​។ ក្រុម​អ្នកស្រុក​បាន​ព្យាយាម​ជីក​អណ្ដូង​ជ្រៅ​ៗ​ ដើម្បី​រក​ប្រភព​ទឹក​នៅ​ក្នុង​ដី​ដែល​រង​ការ​ហួតហែង​ខ្លាំង​។ តំបន់​ជិត​បឹង Turkana ដែល​ជា​បឹង​ទឹកប្រៃ​ដ៏​ធំ​បំផុត​របស់​ពិភពលោកពឹង​ផ្អែកលើ​ទន្លេ​នេះ​។ ប៉ុន្តែ​ការ​កើន​ឡើង​នៃ​ភាព​រាំងស្ងួត​កាន់​តែ​ខ្លាំង​ មានន័យថា​អណ្ដូង​នានា​មិន​អាច​ផ្គត់ផ្គង់​គ្រប់គ្រាន់​ សម្រាប់​ចំនួន​ប្រជាជន​ដែល​ចេះតែ​កើន​ឡើង​ជិត​ ១០០,០០០​នាក់​បានទេ​។ ថ្លែង​នៅ​ក្នុង​ទីក្រុង Kalokol សកម្មជន​បរិស្ថាន​ក្នុងស្រុក​លោក Billy Kepu បាន​ប្រាប់​សារព័ត៌មាន Sky News របស់​អង់គ្លេស​ថា កង្វះ​ទឹកបណ្ដាល​ឲ្យ​មាន​វិបត្តិ​ចំណីអាហារ​។

​មន្ត្រី​កម្មវិធី​គោលនយោបាយ​ស្បៀងអាហារ​ពិភពលោកគឺលោក Gabriel Ekaale បាន​និយាយ​ថា យើង​ជឿ​ថា បម្រែបម្រួល​អាកាសធាតុគឺជា​កត្តា​បង្ក​ឲ្យ​មាន​បញ្ហា​ជាច្រើនដែល​យើង​ធ្លាប់​បាន​ជួប​ប្រទះ​នេះ​ទីនេះ ដោយ​លោក​បាន​បន្ថែម​ថា យើង​កំពុង​មើល​ឃើញ​ភាព​រាំងស្ងួតកាន់តែ​ធ្ងន់ធ្ងរ​ឡើង​ៗ ហើយ​ប្រជាពលរដ្ឋ​ពុំ​ទទួល​បាន​ការ​ផ្គត់ផ្គង់​ទឹកដោះគោ និង​សាច់​គ្រប់គ្រាន់​ទេ។​ មាន​មនុស្ស​ប្រមាណ ៦០០,០០០​នាក់​នៅ​ក្នុង​ប្រទេស​នេះ​ត្រូវការ​ស្បៀងអាហារ​ជា​ចាំបាច់ ឬប្រាក់ ខណៈ​មនុស្ស​ប្រហែល​ ៦០% ​ពុំ​មាន​អាហារ​ទទួលទាន​គ្រប់គ្រាន់​៕

អត្ថបទ៖ សុខមាន