ប្រធានាធិបតីអាមេរិក លោក Donald Trump បានរិះគន់អង្គការសហប្រជាជាតិ កាលពីថ្ងៃអង្គារ (០៤ កុម្ភៈ) ថា "ដំណើរការមិនបានល្អ" ប៉ុន្តែលោកក៏និយាយថាស្ថាប័ននេះមានសក្តានុពលផងដែរ ខណៈលោកបញ្ឈប់ការចូលរួមរបស់អាមេរិក ជាមួយក្រុមប្រឹក្សាសិទ្ធិមនុស្ស និងបន្តបញ្ឈប់ការផ្តល់មូលនិធិសម្រាប់ទីភ្នាក់ងារសង្គ្រោះប៉ាឡេស្ទីន UNRWA រួមទាំងបញ្ជាឱ្យពិនិត្យឡើងវិញនូវទីភ្នាក់ងារវប្បធម៌ UNESCO របស់អង្គការសហប្រជាជាតិ។

នៅក្នុងជម្លោះពាក្យសម្ដីដ៏តានតឹង លោក Trump បានប្រាប់អ្នកយកព័ត៌មានថា "អង្គការនេះមានសក្តានុពលដ៏អស្ចារ្យ ហើយផ្អែកលើសក្តានុពលនេះហើយដែលយើងនឹងបន្តទៅជាមួយ ប៉ុន្តែពួកគេត្រូវតែធ្វើសកម្មភាពរួមគ្នា ព្រោះអង្គការដំណើរការមិនបានល្អទេ ហើយពួកគេមិនបានធ្វើការអ្វីសោះ"។

អង្គការសហប្រជាជាតិ បានរុញច្រានប្រឆាំងនឹងការលើកឡើងរបស់លោក Trump ភ្លាមៗ ដោយអ្នកនាំពាក្យ លោក Stephane Dujarric បាននិយាយថា អគ្គលេខាធិការអង្គការសហប្រជាជាតិ លោក Antonio Guterres "បានធ្វើការដោយមិនគិតនឿយហត់ ដើម្បីអនុវត្តកំណែទម្រង់ជាច្រើន ដើម្បីបង្កើនប្រសិទ្ធភាព និងការច្នៃប្រឌិត"។

គួរបញ្ជាក់ថា លោក Trump បានចុះហត្ថលេខាលើក្រឹត្យមួយកាលពីថ្ងៃអង្គារ ដោយដកខ្លួនចេញពីក្រុមប្រឹក្សាសិទ្ធិមនុស្សរបស់ UN និងបញ្ឈប់ការផ្តល់មូលនិធិសម្រាប់ទីភ្នាក់ងារសង្គ្រោះប៉ាឡេស្ទីន UNRWA។ លោក Trump និយាយថាលោកមិនចង់ដកប្រាក់ពីស្ថាប័នពិភពលោកដែលមានសមាជិក ១៩៣រដ្ឋនេះទេ ប៉ុន្តែលោកត្អូញត្អែរថា ទីក្រុងវ៉ាស៊ីនតោនត្រូវបង់ប្រាក់ក្នុងតួលេខមិនសមាមាត្រនឹងសមាជិកផ្សេងទាល់តែសោះ៕